Hazırda hər 100 uşağın təxminən 1-i ürək xəstəliyi ilə doğulur. Belçikada “Leuven” Universiteti Xəstəxanasından (UZ Leuven) kardioloqların apardığı yeni araşdırma bu vəziyyətin səbəblərindən birinin hamiləlikdə keçən qrip ola biləcəyini göstərdi.
Tədqiqat 1,7 milyon hamiləliyi əhatə edən beynəlxalq bir məlumat bazası üzərində aparılıb. Analiz göstərir ki, sadə tənəffüs yolu infeksiyası və ya qrip belə bəzi ürək qüsurlarının inkişafında rol oynaya bilər.
Araşdırmaya görə, hamiləliyin ilk üç ayında infeksiya keçirən qadınların uşaqlarında doğuşdan gələn ürək qüsurları riski statistik olaraq daha yüksəkdir. Bu qüsurlar xüsusilə ürəyin iki boşluğunu ayıran bölmədə deşik əmələ gəlməsi ilə əlaqədar hallarda ön plana çıxır.
Alimlər qeyd edir ki, bu yalnız əlaqədir və qəti səbəb-nəticə əlaqəsini sübut etmir. Gələcək araşdırmalarda hava çirkliliyi kimi ətraf mühit faktorları da nəzərə alınmalıdır. Həmçinin revmatizm kimi xəstəliklərin mümkün təsirləri də araşdırılmalıdır.
Kardioloq Verner Budts (UZ Leuven) bildirib ki, əgər hamiləliyin ilk üç ayında qripin təsiri təsdiqlənərsə, uşaqlı doğurmağı planlaşdıran qadınlara qış aylarında qrip peyvəndi vurulması tövsiyə edilə bilər. “Bu, uzun müddətli əhəmiyyətli sağlamlıq faydası təmin edə bilər”, – deyə Budts vurğulayıb.
çap et