ABŞ Mərkəzi Bankından (FED) gələn son açıqlamalar qurum daxilində pul siyasətinə yanaşmadakı fikir ayrılıqlarını üzə çıxardı. Klivlend FED rəhbəri Bet Hammak (Beth Hammack) inflyasiya ilə mübarizə üçün sərt pul siyasətinin davam etdirilməsini zəruri hesab edərkən, sədr müavini Mişel Bouman (Michelle Bowman) əmək bazarındakı zəifliklərə diqqət çəkərək ardıcıl faiz endirimlərinə çağırış etdi.
Klivlend FED rəhbəri CNBC-nin “Squawk Box Europe” proqramında çıxış edərək qeyd edib ki, iqtisadiyyat həm inflyasiya, həm də məşğulluq hədəfləri baxımından çətin mərhələdən keçir.
Onun sözlərinə görə, “İnflyasiyanı 2%-lik hədəfə endirmək üçün məhdudlaşdırıcı pul siyasətini davam etdirməliyik. Bu, ikili mandatımız – inflyasiya və məşğulluq – arasında balanslı yanaşma tələb edir”.
Xidmət sektorunda davam edən qiymət təzyiqlərinə toxunan Hammak bildirib ki, “sığorta kimi sahələrdə bahalaşma yalnız gömrük tariflərindən qaynaqlanan müvəqqəti təsirlər deyil, daha davamlı tendensiyaları göstərir. Buna görə də daha ehtiyatlı davranmalıyıq”.
Hammak hazırkı şəraitdə inflyasiyanın gözləniləndən daha uzun müddət yüksək qalacağı ehtimalını vurğulayıb. Onun fikrincə, inflyasiyanın hədəf səviyyədən yuxarı qalma ehtimalı qarşıdakı 1-2 il ərzində çox yüksəkdir.
Keçən həftə də oxşar mövqe sərgiləyən Hammak FED-in mövcud sərt pul siyasətini vaxtından əvvəl yumşaltmasının riskli olduğunu qeyd edərək, ehtiyatlılıq çağırışı etmişdi.
***
FED-in nəzarətə cavabdeh sədr müavini Mişel Bouman isə fərqli yanaşma ortaya qoyub. Onun sözlərinə görə, son göstəricilər əmək bazarında açıq-aşkar zəifliklər üzə çıxarıb və bu vəziyyəti düzəltmək üçün pul siyasətində ardıcıl faiz endirimləri qaçılmazdır.
Bouman bildirib ki, maaşlar nəzərə alınmadıqda inflyasiya hədəfdən çox da uzaqda deyil, amma məşğulluqdakı zəifləmələr ciddi risk yaradır. O, Federal Açıq Bazar Komitəsini (FOMC) əmək bazarındakı yavaşlamaya daha proaktiv yanaşmağa çağırıb.
Bet Hammak inflyasiyanı prioritetləşdirərək sərt siyasətin davamını müdafiə edir, Mişel Bouman isə əmək bazarındakı problemlərin əsas riskə çevrildiyini düşünür.
Bouman xəbərdarlıq edib ki, FED əmək bazarındakı mövcud problemlərə vaxtında cavab verməsə, gələcəkdə daha kəskin və qəfil siyasət dəyişikliklərinə ehtiyac yarana bilər. Onun sözlərinə görə, qurum hazırda “əyridən geri qalma” riski ilə üz-üzədir və gecikən addımların nəticəsi daha ağır ola bilər.
çap et