Neft qiymətləri bu gün Asiya sessiyasında dörd ayın ən aşağı səviyyələrindən qismən qalxsa da, OPEC+ qrupunun gələn ay hasilatı yenidən artıracağına dair xəbərlər fonunda təklifin artması ilə bağlı narahatlıqlar bazarı həftəlik kəskin ucuzlaşmaya aparır.
ABŞ-da davam edən hökumət bağlanması da tələb perspektivinə əlavə təzyiq göstərir.
Bakı vaxtı ilə 05:30-da dekabr fyuçersləri üzrə “Brent” markalı xam neft 0,5% bahalaşaraq bir barel üçün 64,44 dollara, “WTI” xam nefti isə 0,5% artaraq 60,80 dollara yüksəldi.
Hər iki göstərici əvvəlki sessiyada iyunun əvvəlindən bəri ən aşağı həddə geriləyərək təxminən 2% ucuzlaşmışdı. Həftəlik bazada isə 8%-ə yaxın azalma qeydə alınması gözlənilir.
Treyderlər həftənin əvvəlində yayılan və noyabrda hasilatın bu ayınkından üç dəfə çox – gündəlik 500 min barel artırıla biləcəyini iddia edən xəbərlərdən sonra ehtiyatlı davranır.
Bu addım qrupun hasilat ixtisarlarını ləğv etmək prosesində yeni mərhələ olacaq. “Reuters”in araşdırmasına görə, sentyabrda OPEC+ hasilatı artıq gündəlik 330 min barel artaraq 28,40 milyon barelə yüksəlib.
Səudiyyə Ərəbistanı və digər istehsalçılar bazar payını geri qazanmağa çalışır. Lakin analitiklər əlavə həcmlərin artıq zəifləyən istehlak siqnalları göstərən bazarı daha da sıxışdıra biləcəyi barədə xəbərdarlıq edirlər. ANZ analitiklərinin qeydində deyilir ki, “OPEC+ daha bir böyük istehsal artımı, zavod təmirləri, zəifləyən iqtisadi artım fonunda xam neft üzərində təzyiq artır və tələbin boğulması riski var”.
Qrupun növbəti nazirlər toplantısı oktyabrın 5-nə planlaşdırılır. Bu iclasda noyabr planının dəqiqləşdirilməsi gözlənilir. Daha dərin və ya sürətli artım siqnalları qiymətlərin yenidən enməsinə səbəb ola bilər.
Neft bazarları eyni zamanda ABŞ-dakı siyasi qeyri-müəyyənliklə də üz-üzədir. Federal hökumətin bağlanması artıq üçüncü gününə keçib.
Qapanma nəticəsində təxminən 800 min “zəruri olmayan” federal işçi məzuniyyətsiz evə göndərilib, mühüm iqtisadi hesabatların dərc olunması isə dayandırılıb. Bu, tələb perspektivini daha da bulanıqlaşdırır.
İşsizlik, inflyasiya və istehsal barədə məlumatların vaxtında açıqlanmaması ABŞ istehlak tendensiyalarının və Federal Ehtiyat Sisteminin siyasətinin qiymətləndirilməsini çətinləşdirir.
Qapanma qısamüddətli dövrdə ailə xərclərini azalda, etimadı zəiflədə bilər. Bu isə yanacaq tələbinin artımını məhdudlaşdıracaq amil kimi dəyərləndirilir.
çap et