Azərbaycan Vatikan və Katolik dünyası ilə münasibətlərini daha da möhkəmləndirir. Ölkə Müqəddəs Taxt-Tacdakı (Vatikan) tarixi katakombaların bərpasına dəstək verir və paralel şəkildə Azərbaycanda yeni katolik kilsəsinin inşasını həyata keçirir. Bu sözlər “Euronews”un saytında dərc olunan və Esmira Əliyevanın müəllifü olduğu “Azerbaijan strengthens ties with Vatican with restorations in Holy See” (“Azərbaycan Vatikanla əlaqələri möhkəmləndirir – Müqəddəs Taxt-Tacda bərpa işləri aparılır”) başlıqlı məqalədə deyilir.
Vaxt.AZ “Euronews”a istinadən xəbər verir ki, IV əsrə aid tarixi “Kommodilla katakombaları” Azərbaycanın dəstəyi ilə tam bərpa edilib və bərpadan sonra Azərbaycan Respublikasının birinci vitse-prezidenti Mehriban Əliyevanın iştirakı ilə rəsmi açılış mərasimi baş tutub.
Bərpa layihəsi 4 mart 2021-ci il tarixində Heydər Əliyev Fondu ilə Müqəddəs Arxeologiya üzrə Papalıq Komissiyası arasında imzalanmış razılaşma əsasında həyata keçirilib.
XVIII əsrdə kəşf edilən “Kommodilla katakombaları”nda ilk arxeoloji tədqiqatlar 1900-cü ildə aparılıb. Bu katakombalar xristianlığın erkən dövrünə aid ən qədim artefaktları qoruyur və ənənəvi olaraq xristian şəhidlər – Felisissimus və Aqapitusun dəfn olunduğu yer kimi tanınır. Orta əsrlərdə həmin ərazi xristian zəvvarların mühüm ziyarət məkanına çevrilmişdi.
Dinlərarası dialoq vurğulandı
Mehriban Əliyeva bu yaxınlarda həyata keçirdiyi Roma səfəri çərçivəsində Papa XIV Leo ilə görüşüb. Görüşdə Papa Azərbaycanla dinlərarası dialoqun əhəmiyyətini xüsusi vurğulayıb.
Səfər zamanı Mehriban Əliyeva həmçinin Vatikan Apostol Kitabxanasını ziyarət edib, “Müqəddəs Pyotr Bazilikası”nda aparılan bərpa işləri ilə tanış olub və Avropanın ən böyük uşaq xəstəxanası olan “Bambino Gesù” klinikasını da ziyarət edib.
Son illərdə Azərbaycanla Müqəddəs Taxt-Tac arasında ikitərəfli münasibətlər xeyli inkişaf edib. Tərəflər bərpa, elmi əməkdaşlıq və mədəni mübadilə sahələrində fəal əməkdaşlıq aparır.
Bu tərəfdaşlığın növbəti göstəricisi kimi, Bakıda Müqəddəs II İohann Pavelin (John Paul II) adına ikinci katolik kilsəsinin inşası planlaşdırılır. Vatikanın Dövlətlərlə Münasibətlər üzrə katibi arxiyepiskop Pol Riçard Qallaqer 2024-cü ilin dekabrında kilsənin təməlqoyma mərasimində iştirak edərək ərazini xeyir-dua ilə açıb.
Layihə Azərbaycandakı böyüyən katolik icmasının tələbatını və dinlərarası dialoqun davamlı inkişafını əks etdirir.
çap et