İnflyasiyanın Həcc ziyarətinə nə aidiyyəti?

Azərbaycandan 3 dəfə daha uzaqda yerləşən İndoneziyanın zəvvarları 2 dəfə az ödəyir

Qafqaz Müsəlmanları İdarəsi izah etməyə çalışır ki, “bütün ölkələrdə müşahidə edilən qiymət artımları və yeni xidmətlərin təqdim edilməsi” bahalaşmaya səbəb olub.

Bu cür izah dini qurumların yox, kommersiya şirkətlərinin işlətdiyi sözlərdir. Siz nə istehsal edirsiniz ki, qiymət artımını dünyadakı bazar tendensiyaları ilə əsaslandırırsınız? Dünyada baş verən inflyasiyanın, bazar dalğalarının ibadət haqqına nə aidiyyəti var?

Əksinə, bu il yüksək rəqabət və yeni aviaşirkətlərin bazara girməsi nəticəsində təyyarə biletlərinin qiymətləri kəskin şəkildə ucuzlaşıb.

İkincisi “yeni xidmətlər” dediyiniz nədir? Həccin mənəvi mahiyyətinə nə əlavə etmisiniz? Məkkə yolunda “əlavə rahatlıq” təklif etmək, sanki ibadəti turpaketə çevirməkdir.

Dini inanclı insanların din alverçiləri tərəfindən necə aldadıldığını çox sadə izah edim: Azərbaycan – Səudiyyə 2800 km və həcc ziyarəti 10370 manat.

İndoneziya – Səudiyyə Ərəbistanı 7800 km və həcc bizim pulla 9390 manat. O da 5820 manatını (62 %) zəvvar, yerdə qalan 3570 manatını (38 %) İndoneziya dini qurumu ödəyir.