“Google”un ofisini qurd basdı

Nyu-Yorkda 15 il əvvəlki həşərat istilası təkrarlanıb

Vaxt.az “WIRED” nəşrinə istinadən xəbər verir ki, zərərvericilərə qarşı mütəxəssis qruplar və axtarış itləri “taxtakurusu mövcudluğu barədə güclü sübutlar” aşkar etdikdən sonra, bazar günü işçilərə məsələyə bağlı məlumat göndərilib.

Mənbələr bildirib ki, istilanın “Chelsea” düşərgəsindəki bir sıra iri oyuncaqlarla əlaqəli ola biləcəyi düşünülür, lakin bu hələ təsdiqlənməyib. Qeyd edək ki, “Chelsea” düşərgəsi 1930-cu illərdə inşa edilmiş tarixi bir dəmiryolu terminalının yerində yerləşir və tikintisi təxminən 2,1 milyard dollara başa gəlib.

Şirkətin ətraf mühit, sağlamlıq və təhlükəsizlik komandası adından Nyu-Yorkdakı bütün işçilərə göndərilən emailda, işlərin tamamlanmasına qədər ofisdən uzaq durmaları tələb olunub. Lakin bəzi işçilər bazar ertəsi ofisə qayıdıb.

Şirkət Nyu-Yorkdakı digər kamplarda da “ekstra tədbir” məqsədilə əlavə yoxlamalar aparır. Şirkət işçilərdən, yataq qurdu ilə təmas zamanı simptomlar müşahidə olunarsa, dərhal məlumat vermələri və şirkət daxilində həşəratlar görmələri halında məlumat vermələrini tələb edib.

“Google” işçilərinə evlərində də adıçəkilən zərərvericilər aşkarlansa, peşəkar zərərverici müalicəsi şirkətlərinə müraciət etmələri tövsiyə edilib.

Yataq qurdlarının məhv edilməsi çətindir, çünki onların sürətli çoxalma dövrləri, geniş yayılmış insektisidlərə qarşı müqaviməti və uyğunlaşma qabiliyyətləri var. Bu parazitlərin asanlıqla yayıldığı, çamadan, geyim və digər əşyalar vasitəsilə yeni məkanlara sürətlə keçdiyi də qeyd olunur.

“The Bed Bug Experts” bildirir ki, “hər hansı bir yeri uğurla dezinfeksiya etsəniz belə, istilaya məruz qalmış əşyaları evinizə gətirsəniz və ya qurdların olduğu bir məkana səfər etsəniz, yenidən yoluxma riski mövcuddur”.

Qeyd edək ki, “Google”un Nyu-York ofisləri bir dəfə də – 2010-cu ildə də yataq qurdları tərəfindən istila olunmuşdu. O zaman 9-cu küçədə yerləşən ofis, zərərvericilərin Nyu-Yorkda daha geniş yayılmasının səbəbi hesab olunurdu.