Qlobal maliyyə bazarlarında qiymətli metallar bahalaşmaqda davam edir. ABŞ–Venesuela münasibətlərində artan gərginlik fonunda investorların təhlükəsiz aktivlərə yönəlməsi qızıl və gümüş qiymətlərinin rekord səviyyələrə qalxmasına səbəb olub.Vaxt.AZ xəbər verir ki, Spot qızıl gün 0,9% artımla 4.497,55 dollar səviyyəsinə yüksələrək tarixi maksimumu yeniləyib. Daha sonra qiymət 4.486,41 dollarda dayanıb. ABŞ-da fevral ayı üzrə qızıl fyuçersləri isə 1,1% bahalaşaraq 4.519,70 dollara yüksəlib.
“KCM Trade” şirkətinin baş analitiki Tim Uoterer bildirib ki, ABŞ və Venesuela arasında gərginliyin dərinləşməsi qızılı qeyri-müəyyənliyə qarşı qoruyucu alət kimi investorların radarında saxlayır. Onun sözlərinə görə, ABŞ-da faiz dərəcələrinin daha da yumşaldılacağına dair gözləntilər bu həftə qızılın kəskin bahalaşmasının əsas səbəblərindən biridir.
Analitik qeyd edib ki, alıcılar qiymətli metalları portfellərin şaxələndirilməsi və dəyərin qorunması üçün effektiv vasitə kimi görməyə davam edirlər və nə qızıl, nə də gümüş bazarında hələ pik nöqtəyə çatıldığı düşünülmür.
ABŞ Prezidenti Donald Trampın ötən həftə Venesuelaya qarşı sanksiyalar çərçivəsində ölkəyə daxil olan və ölkədən çıxan bütün neft tankerlərini əhatə edən “blokada” elan etməsi bazarlarda geosiyasi riskləri artırıb.
Qızıl bazarına əlavə dəstək Trampın yanvar ayının əvvəlinə qədər yeni ABŞ Federal Ehtiyat Sistemi rəhbəri təyin edə biləcəyi ilə bağlı yayılan məlumatlardan gəlib. Yumşaq pul siyasəti gözləntiləri fonunda gələn il iki faiz endirimi də qiymətlərə təsir edib.
Gümüş bazarında da yüksəliş davam edir. Spot gümüş 1% artımla 69,98 dollar səviyyəsinə qalxaraq tarixi rekord vurduqdan sonra 69,70 dollardan ticarət olunub. İlin əvvəlindən bu yana gümüşün qazancı 141%-i keçərək qızılı geridə qoyub. Bu artım əsasən təklif çatışmazlığı, sənaye sektorundan güclü tələb və investisiya axınları ilə əlaqələndirilir.
“Pepperstone” şirkətinin baş strateqi Maykl Braun bayramla əlaqədar likvidliyin azalması səbəbindən qısamüddətli konsolidasiya ehtimalının olduğunu bildirib. Bununla yanaşı, o, ticarət həcmlərinin bərpası ilə qiymətli metallarda yüksəlişin yenidən sürətlənəcəyini qeyd edib. Braun qızıl üçün gələn il 5.000 dollar səviyyəsini təbii hədəf, gümüş üçün isə 75 dollar səviyyəsini daha uzunmüddətli perspektivdə mümkün qiymət kimi dəyərləndirib.
Digər qiymətli metallarda da artım qeydə alınıb. Platin 1,2% bahalaşaraq 2.145,10 dollara yüksəlib və son 17 ilin ən yüksək səviyyəsini görüb. Paladyum isə qızıl və gümüşdəki yüksəlişi izləyərək 3,4% artımla 1.819,00 dollar səviyyəsinə qalxıb ki, bu da son üç ilin maksimumudur.
çap et