Belçika hökuməti mümkün böhran ssenarilərinə qarşı əhalinin hazırlığını artırmaq məqsədilə yeni kampaniya başladıb və vətəndaşlara ən azı 72 saatlıq ərzaq və su ehtiyatı saxlamaq çağırışı edib. Rəsmi məlumatlara görə, hər bir vətəndaşın xarici yardıma ehtiyac olmadan minimum üç gün yaşaya biləcək şəkildə hazırlıq görməsi tövsiyə olunur.VAXT.AZ “The Brussels Times”a istinadən xəbər verir ki, Belçika Daxili İşlər Nazirliyinin yaydığı açıqlamaya görə, kampaniya çərçivəsində “Birlikdə hazırıq” adlı proqram həyata keçirilir və bu ictimai risklərə qarşı dayanıqlığın artırılmasını hədəfləyir. Təlimata əsasən, hər evdə su, uzunmüddətli qida məhsulları, ilk yardım dəsti, fənər, telefon üçün enerji mənbəyi və vacib sənədlərin surəti olmalıdır.
Belçika Daxili İşlər naziri Bernard Quintin bildirib ki, Avropa uzun müddət sabitlik içində yaşasa da, bu vəziyyətin gələcəkdə də davam edəcəyinə zəmanət yoxdur. O, iqlim dəyişiklikləri, siber hücumlar və geosiyasi risklərin artdığını qeyd edərək, “hazırlıq artıq seçim deyil, zərurətdir” ifadəsini işlədib.
Oxşar çağırışlar son aylarda bir neçə Avropa ölkəsində də verilib. Finlandiya və İsveç hökumətləri vətəndaşlara yenilənmiş mülki müdafiə təlimatları təqdim edib və 72 saatlıq özünü təminetmə hazırlığını tövsiyə edib.
Almaniya və bir sıra Şimali və Baltik ölkələri sivil müdafiə planlarını genişləndirərək vətəndaşlara evdə təcili ehtiyat saxlamaq çağırışlarını artırıb.
Avropa rəsmiləri bu addımların məqsədinin panika yaratmaq deyil, cəmiyyətin böhranlara qarşı dayanıqlığını artırmaq olduğunu bildirir. Qeyd olunur ki, əsas risklər iqlim fəlakətləri, siber hücumlar və enerji təchizatı pozuntuları ilə bağlıdır.
Ekspertlərin fikrincə, Avropada təhlükəsizlik yanaşması dəyişir və dövlətlər vətəndaşları da böhran hazırlığının bir hissəsi kimi nəzərdən keçirməyə başlayır.
çap et