“Meta” və “Microsoft” süni intellekt sahəsinə rekord həcmdə investisiyalar artırdığı bir vaxtda minlərlə əməkdaşın ixtisar edildiyini açıqlayıb.VAXT.AZ “The Guardian”a istinadən xəbər verir ki, mayın 20-dən etibarən “Meta” işçilərinin 10%-ni — təxminən 8000 nəfəri ixtisar etməyi planlaşdırır. Bundan əlavə, 6000 açıq vakansiyanın da bağlanacağı bildirilir.
Şirkət daxili açıqlamasında bu qərarla digər böyük investisiyaları kompensasiya etdiyini deyib. “Meta” rəhbərliyi süni intellekt sahəsinə bu il 115–135 milyard dollar aralığında investisiya planlaşdırdığını açıqlayıb.
Eyni gündə “Microsoft” ABŞ-dakı işçilərinin təxminən 7%-ni əhatə edən könüllü təqaüd proqramı təqdim edib. Bu proqram çərçivəsində 8000-dən çox əməkdaşın daxil ola biləcəyi bildirilir.
Şirkət proqramı “yaş+iş stajı=70 və yuxarı” formuluna əsaslandırır. “Microsoft” rəhbərliyi süni intellektin artıq şirkətdə kod yazma prosesinin təxminən 30%-ni əvəz etdiyini bildirib.
Məlumata görə, “Microsoft”un süni intellekt infrastrukturuna illik xərcləri 110–120 milyard dollar səviyyəsində qiymətləndirilir. Şirkət bu investisiyaları gələcək məhsuldarlıq artımı ilə əsaslandırır.
“Meta” rəhbərliyi daha əvvəl bildirmişdi ki, bəzi layihələr artıq böyük komandalar tələb etmir və gələcəkdə bir çox işi tək bir yüksək ixtisaslı mütəxəssis görə bilər.
Eyni zamanda “Microsoft”un İA rəhbərliyindən gələn proqnozlara görə, süni intellekt yaxın 12–18 ay ərzində işlərin böyük hissəsini görə bilər.
Daha əvvəl “Reuters”in məlumatına görə, “Meta” ABŞ-dakı bəzi işçilərin kompüterlərində siçan hərəkətləri və klaviatura istifadəsini izləyən proqram təminatı test etməyə başlayıb. Bu məlumatların İA modelinin öyrədilməsi üçün istifadə edildiyi iddia olunub.
çap et