ABŞ İranı vurdu

Bəndər-Abbas və Keşm limanlarına hava zərbələri endirilib

VAXT.AZ xəbər verir ki, bu barədə “Fox News” telekanalına danışan yüksəkvəzifəli amerikalı məmur məlumat verib.

Mənbənin sözlərinə görə, zərbələr dünən həyata keçirilib. Bununla yanaşı, Vaşinqton hücumların müharibənin yenidən başlaması və ya aprelin 7-də elan olunan atəşkəsin pozulması anlamına gəlmədiyini bildirir.

ABŞ rəsmisi isə bildirib ki, Vaşinqton hələ də Tehran rəhbərliyinin ABŞ-nin iki ölkə arasında gərginliyi azaltmağa yönəlmiş təklifinə cavabını gözləyir. Həmin təklifdə İranın nüvə proqramı ilə bağlı əsas mübahisəli məsələlərin isə hələlik açıq qaldığı vurğulanır.

Bu arada İran tərəfi hücumlara sərt reaksiya verib. İran parlamentinin Milli Təhlükəsizlik Komissiyasının rəhbəri İbrahim Əzizi bildirib ki, “düşmənin hər hansı səhvi əvvəlkindən daha sərt və dağıdıcı cavabla qarşılanacaq”.

İran mediası Bəndər-Abbas şəhərində partlayış səslərinin eşidildiyini, Hörmüzqan əyalətində yerləşən Keşm adasında isə İran və ABŞ silahlı qüvvələri arasında toqquşmaların baş verdiyini yazıb.

İran Silahlı Qüvvələrinin müharibə əməliyyatlarını koordinasiya edən “Xatəmül-Ənbiya” Mərkəzi Qərargahının sözçüsü İbrahim Zülfiqari də ABŞ ordusunu atəşkəsi pozmaqda ittiham edib. Onun sözlərinə görə, ABŞ qüvvələri İran neft tankerinə zərbə endirib.

Eyni zamanda İran mediasında Tehranda hava hücumundan müdafiə sistemlərinin aktivləşdirildiyi barədə məlumatlar yayılıb.

Digər tərəfdən, İranın “Tasnim” agentliyi Hörmüz boğazında İran Hərbi Dəniz Qüvvələrinin ABŞ-yə məxsus üç esminesə hücum etdiyini iddia edib. Məlumata görə, hücum raketlər və kamikadze dronlarla həyata keçirilib və ABŞ hərbi gəmilərinə ziyan dəyib. ABŞ tərəfi isə hələlik bu iddialara münasibət bildirməyib.