Moskva paradının portreti

Kremlin qarşısındakı hərbi keçidi “qəssab general” Andrey Mordviçev idarə edib

Rusiya dövlət agentliyi TASS-ın məlumatına görə, Mordviçev paradın əvvəlində müdafiə naziri Andrey Belousova qoşunların hazırlığı barədə raport verib, daha sonra isə onunla birlikdə parad sıralarını yoxlayıb.

VAXT.AZ Rusiya mediasına istinadən xəbər verir ki, bu il 9 May tədbirləri gücləndirilmiş təhlükəsizlik tədbirləri fonunda keçirilib. Kreml ətrafı ziyarətçilər üçün bağlanıb, paytaxtda mobil internet və SMS xidmətlərində məhdudiyyətlər tətbiq olunub.

Andrey Mordviçev 14 yanvar 1976-cı ildə Pavlodar şəhərində anadan olub. Novosibirsk Ali Hərbi Komandirlər Məktəbini, daha sonra Rusiya Silahlı Qüvvələrinin Akademiyasını və Baş Qərargah Akademiyasını bitirib.

Hərbi karyerasına motoatıcı hissələrdə başlayan Mordviçev müxtəlif tank və ümumqoşun birləşmələrinə rəhbərlik edib. O, 2022-ci ildə Cənub Hərbi Dairəsinin 8-ci ümumqoşun ordusuna komandanlıq edirdi və məhz bu birləşmə Mariupolun mühasirəsində əsas rol oynayıb.

Sonrakı dövrdə o, Mərkəzi Hərbi Dairəyə və Ukraynada “Mərkəz” qoşun qruplaşmasına rəhbərlik edib. 2025-ci ilin mayında isə Rusiya Quru Qoşunlarının baş komandanı təyin olunub.

2022-ci ilin yazında Mordviçevin komandanlığı altında olan Rusiya qüvvələri Mariupol şəhərini mühasirəyə alaraq intensiv bombardmanlar həyata keçirib. Həmin qüvvələr Azovstal metallurgiya zavoduna hücumlarda da iştirak ediblər.

Ukrayna prokurorluğu və beynəlxalq hüquq müdafiə təşkilatları Mordviçevi mülki infrastruktura zərbələr, humanitar yardımın bloklanması və müharibə cinayətləri ilə bağlı araşdırmalarda adı keçən əsas hərbi rəhbərlərdən biri hesab edir.

2024-cü ilin fevralında o, Avdeyevka istiqamətində hücuma rəhbərlik edib. Rusiya ordusu şəhəri ələ keçirsə də, əməliyyat çoxsaylı itkilərlə müşayiət olunub. Hərbi analitik Yan Matveyevin sözlərinə görə, rus qüvvələri “sonsuz piyada hücumları və böyük itkilər hesabına” irəliləyə bilib.

2022-ci ildə Ukrayna mənbələri Mordviçevin Çernobayevka yaxınlığında öldürüldüyünü bildirsələr də, bu məlumat sonradan təsdiqlənməyib.

Rusiya hərbi tibbi sənədlərinə əsasən, o, 2022-ci il aprelin 11-də Mariupol yaxınlığında ağır qəlpə yaraları alıb və müalicə üçün əvvəlcə Novoazovska, sonra isə Rostovdakı hərbi hospitala təxliyə olunub.

Mordviçev müharibənin ilk aylarında tez-tez Ramzan Kadırovlə birlikdə yayılan videolarda görünürdü. Kadırov onu “ən yaxşı komandan” adlandırırdı.

Bir sıra müşahidəçilərin fikrincə, Kadırovun açıq dəstəyi Mordviçevin Rusiya hərbi elitasında mövqelərinin güclənməsində rol oynayıb.

2023-cü ildə rusiyalı təbliğatçı Vladimir Solovyova verdiyi müsahibədə Mordviçev müharibənin gələcəyi ilə bağlı danışarkən “Ukrayna yalnız başlanğıcdır” ifadəsini işlədib və münaqişənin Şərqi Avropanın digər bölgələrinə də yayıla biləcəyini istisna etməyib.

2023-cü ildə Avropa Birliyi və İsveçrənin sanksiyalar tətbiq etdiyi Mordviçevə həmin ilin sonunda ona general-polkovnik rütbəsi verilib, bir il sonra isə “Rusiya Qəhrəmanı” adı təqdim olunub.

Siyasi müşahidəçilər və hərbi analitiklər Mordviçevi Prezident Vladimir Putinin son illərdə önə çıxardığı əsas generallardan biri hesab edirlər. ABŞ-də fəaliyyət göstərən Xarici Siyasət Araşdırmaları İnstitutunun (“Foreign Policy Research Institute” – FPRİ) eksperti Rob Li onu gələcəkdə Baş Qərargah rəisi Valeri Gerasimovin mümkün varisi kimi dəyərləndirib.

Mordviçevin 9 May paradına rəhbərlik etməsi Kreml tərəfindən sadəcə protokol qərarı deyil, həm də siyasi mesaj kimi qiymətləndirilir. Bu addım Ukraynada ağır itkilərlə müşayiət olunan hücum taktikalarına görə tanınan bir generalın Rusiya hərbi sistemində yüksəlişini nümayiş etdirir.

Başqa sözlə, Kreml Ukrayna müharibəsində nəticə gətirən, lakin böyük canlı qüvvə itkiləri hesabına əldə olunan taktikanı uğur kimi təqdim etməyə davam edir.