ABŞ və Böyük Britaniya İranın nüvə proqramı və regional fəaliyyəti ilə bağlı gərginlik fonunda Tehranla əlaqəli şəxslər və qurumlara qarşı yeni sanksiya paketləri elan edib.
VAXT.AZ “Reuters”ə istinadən xəbər verir ki, ABŞ Maliyyə Nazirliyi İranın nüvə proqramı və regiondakı fəaliyyətləri ilə əlaqədar artan gərginlik çərçivəsində İranla əlaqəli 3 şəxs və 9 qurumu sanksiya siyahısına daxil edib. Nazirliyin açıqlamasına görə, sanksiyalara Honq-Konq mərkəzli 4 şirkət də daxildir.
ABŞ tərəfi bildirir ki, bu şəbəkələr İran İnqilab Keşikçiləri Korpusunun (SEPAH) sanksiyalardan yayınmasına yardım edir və bunun üçün saxta şirkətlərdən, rəqəmsal aktiv infrastrukturlarından və müxtəlif xidmət təminatçılarından istifadə olunur. ABŞ Maliyyə Nazirliyi İranla bağlı rəqəmsal aktiv əməliyyatlarının illik milyardlarla dollar həcmində olduğunu və bu vəsaitlərin sanksiyalardan yayınmaq üçün istifadə edildiyini qeyd edib.
ABŞ Maliyyə Nazirliyinin Maliyyə Cinayətləri ilə Mübarizə Şəbəkəsi (FinCEN) tərəfindən yayımlanan xəbərdarlıqda maliyyə institutlarına SEPAH-la əlaqəli tədarük zəncirlərinin maliyyələşdirilməsi və ya asanlaşdırılması cəhdlərinə qarşı diqqətli olmaları çağırışı edilib.
ABŞ tərəfi bildirir ki, SEPAH sanksiyalardan yayınmaq üçün saxta şirkətlər, rəqəmsal aktiv platformaları və müxtəlif vasitəçi xidmətlərdən istifadə edir.
Sanksiya qərarları İranla mümkün hərbi qarşıdurma və nüvə razılaşmasının pozulması ehtimallarının artdığı dövrdə qəbul olunub. ABŞ prezidenti Donald Tramp İranla atəşkəsə dair təşəbbüsün Tehranın cavabından sonra “çöküş həddində” olduğunu bildirib.
ABŞ artıq İranın pilotsuz uçuş aparatları və raket proqramı üçün lazım olan komponentlərin əldə olunmasına yardım etdiyi iddia edilən Çin və Honq-Konq şirkətlərinə də sanksiyalar tətbiq edib.
ABŞ qərarlarından bir neçə saat əvvəl Böyük Britaniya da İranla əlaqəli 12 şəxs və quruma qarşı sanksiya tətbiq edib. London bu şəbəkələrin “düşmən fəaliyyətlərdə” iştirak etdiyini, hücumların planlaşdırılmasına yardım etdiyini və ya SEPAH-a maliyyə və logistika dəstəyi göstərdiyini iddia edir.
Britaniya sanksiyaları çərçivəsində aktivlərin dondurulması, səyahət qadağaları və maliyyə və kommersiya məhdudiyyətləri nəzərdə tutulur.
Qərb ölkələrinin koordinasiyalı sanksiya addımları İran üzərində iqtisadi və maliyyə təzyiqin daha da artırıldığını göstərir. Eyni zamanda, bu proses İran–Qərb xəttində diplomatik gərginliyi dərinləşdirir və danışıqların bərpası perspektivlərini daha da çətinləşdirir.
çap et