Ukrayna cəbhəsində istifadə olunan pilotsuz uçuş aparatları (PUA) ənənəvi snayper əməliyyatlarının rolunu əhəmiyyətli dərəcədə azaldıb. Ucuz qiyməti, yüksək manevr qabiliyyəti və partlayıcı daşımaq imkanı sayəsində kiçik PUA-lar döyüş meydanında getdikcə daha çox üstünlük qazanır.VAXT.AZ “The Wall Street Journal” nəşrinə istinadən xəbər verir ki, bir vaxtlar uzaq məsafəli dəqiq atəşlə seçilən snayperlər indi əsasən PUA operatorlarına dəstək verirlər.
Ukraynalı snayper Vyaçeslav Kovalski 2023-cü ilin sonunda təxminən 4 kilometr məsafədən rus zabitini vurduğu iddia edilən atışla tanınmışdı. Lakin o, hazırda bir ildən çoxdur ki, birbaşa snayper atəşi açmadığını bildirib.
Kovalskinin sözlərinə görə, indi o, PUA operatorlarının mövqelərə çatmasına kömək edir, pilotsuz aparatlara partlayıcı quraşdırır və naviqasiya dəstəyi göstərir.
“PUA-lar həm daha effektiv, həm də daha ucuzdur”, – deyə o bildirib. Onun sözlərinə görə, PUA-ların daşıdığı döyüş başlıqları adi güllələrdən qat-qat artıq zərər vurur.
PUA-lar xüsusilə kəşfiyyat və hədəfə operativ zərbə endirmək imkanına görə geniş istifadə olunur. Hücum uğursuz olsa belə, insan itkisi baş vermir.
PUA-ların yayılması artilleriya müşahidəçilərinin rolunu da azaldıb. “İvanhoe” kod adlı digər snayper əvvəllər düşmənin hərəkətlərini 4 kilometr məsafədən izləyərək koordinatları artilleriya bölmələrinə ötürürdü. Bu proses üç-beş dəqiqə çəkirdi.
Hazırda isə həmin hərbçi PUA operatoru kimi fəaliyyət göstərir.
“Operator hədəfi görür və zərbə, demək olar ki, dərhal endirilir”, – deyə o bildirib.
PUA texnologiyalarının inkişafı düşmən snayperlərinin gizlənməsini də çətinləşdirib. Termal kameralar sayəsində ön xəttin yaxınlığında və ya arxasında gizlənən snayperlər daha asan aşkarlanır.
Ukrayna ordusunun müxtəlif briqadaları snayperlərin istifadəsinin azaldığını təsdiqləyir. Bununla belə, bu sahədə təcrübəsi olan hərbçilərin düşmən dronlarına qarşı müdafiə tapşırıqlarında istifadə olunması imkanları nəzərdən keçirilir.
çap et