Britaniyanın enerji nəhəngi BP Azərbaycanın Xəzərdə yerləşən “Babək” qaz yatağının operatoru olmağa hazırlaşır.Vaxt.az “Reuters”ə istinadən xəbər verir ki, mənbələrin bildirdiyinə görə, iyunun 1-də Azərbaycan Respublikası Dövlət Neft Şirkəti (SOCAR) və BP arasında razılaşmanın rəsmi şəkildə elan olunacağı gözlənilir. Hazırda “Babək” yatağı SOCAR-ın rəhbərlik etdiyi vahid strukturun tərkibində olsa da, yeni sazişdən sonra layihə ayrıca idarə olunacaq və operatorluq BP-yə veriləcək.
“Reuters” yazır ki, “Babək” yatağında təxminən 400 milyard kubmetr qaz və 80 milyon ton kondensat ehtiyatı olduğu ehtimal olunur. Bu göstəricilər yatağı Azərbaycanın ən böyük perspektivli qaz layihələrindən birinə çevirir.
BP və SOCAR hələlik məsələ ilə bağlı rəsmi açıqlama verməyiblər. Bununla belə, analitiklər hesab edirlər ki, layihənin BP-yə verilməsi təsadüfi qərar deyil. Şirkət artıq uzun illərdir Azərbaycanın əsas enerji layihələrinin operatorudur və ölkənin neft-qaz sektorunda dominant xarici investor sayılır.
Hazırda BP “Azəri-Çıraq-Günəşli” yataqlar blokunun, “Şahdəniz” qaz yatağının, Bakı–Tbilisi–Ceyhan neft kəmərinin və Cənubi Qafqaz Boru Kəmərinin əsas operatorudur.
Ekspertlərin fikrincə, “Babək” layihəsinin ayrıca struktur kimi ayrılması Azərbaycanın qaz ixrac imkanlarını artırmaq strategiyasının tərkib hissəsidir. Son illərdə Avropa Birliyi Rusiya qazından asılılığı azaltmağa çalışdığı üçün Azərbaycan Qərb üçün mühüm alternativ enerji mənbələrindən birinə çevrilib.
Xüsusilə “Cənub Qaz Dəhlizi”nin genişləndirilməsi planları fonunda Bakı əlavə qaz ehtiyatlarının işlənməsinə ehtiyac duyur. “Babək” yatağı da məhz bu məqsədlə gələcək ixrac bazası kimi nəzərdən keçirilir.
Enerji bazarı üzrə analitiklər hesab edirlər ki, layihənin BP-yə verilməsi xarici investorlar üçün də mühüm siqnaldır. Çünki bu addım Azərbaycanın uzunmüddətli enerji əməkdaşlığında Qərb şirkətlərinə prioritet verməyə davam etdiyini göstərir.
“Babək” yatağı uzun illərdir perspektiv yataq kimi tanınsa da, indiyədək onun ayrıca beynəlxalq layihə kimi inkişaf etdirilməsi ilə bağlı rəsmi qərar açıqlanmamışdı. “Reuters”in məlumatı təsdiqlənərsə, bu, son illərdə Azərbaycanın enerji sektorunda ən mühüm yeni layihələrdən biri hesab oluna bilər.
çap et