Müdafiə naziri general-polkovnik Zakir Həsənovun təsdiq etdiyi tədbirlər planına əsasən Murovdağ şəhidlərinin xatirəsinə həsr olunmuş abidənin açılışı olub.
Müdafiə Nazirliyinin mətbuat xidmətindən Vaxt.az-a verilən məlumata görə, mərasimdə övladları Kəlbəcər rayonu və Murovdağ uğrunda aparılan döyüşlərdə şəhidlik zirvəsinə ucalmış döyüşçülərimizin valideynləri, müharibə veteranları, ictimaiyyət nümayəndələri və bölgədə yerləşən hərbi hissənin şəxsi heyəti iştirak edib.
Müdafiə Nazirliyinin zabiti polkovnik Abdulla Qurbani mərasimi açaraq qeyd edib ki, Ulu Öndər Heydər Əliyev Azərbaycanın ərazi bütövlüyü, müstəqilliyi və işğal edilmiş ərazilərimizi düşmən tapdağından azad edərkən canlarından, qanlarından keçən oğul və qızlarımızın xatirəsini həmişə əziz tutar və onların xatirələrinin əbədiləşdirilməsi üçün səyini əsirgəməzdi. Möhtərəm Prezidentimiz cənab İlham Əliyev də bu ənənəni uğurla davam etdirir və şəhid ailələri ölkə rəhbərinin daim diqqət mərkəzindədir.
Müdafiə Nazirliyinin rəhbərliyi də bu məsələni daim diqqətdə saxlayır, müntəzəm olaraq şəhidlərin və qəhrəmanların xatirə günləri geniş qeyd olunur.
Müdafiə nazirinin əmri ilə Azərbaycan Əfqanıstan Veteranları İctimai Birliyi ilə birgə Silahlı Qüvvələrdə keçiriləcək tədbirlərin təşkili üzrə işçi qrupu yaradılıb, tədbirlər planı təsdiq edilib.
Murovdağ şəhidlərinin xatirə abidəsinin yaranmasında Azərbaycan Əfqanıstan müharibəsi veteranları da yaxından iştirak ediblər.
Hərbi orkestrin ifa etdiyi Azərbaycan Respublikasının Dövlət Himnindən sonra abidənin açılışını bildirən rəmzi lent kəsilib.
Azərbaycan Əfqanıstan Veteranları İctimai Birliyinin sədri Məhəmməd Vəliyev, birliyin fəallarından Əbülfət Hüseynov, Məhiyyyəddin Rüstəmov, Mirşamil Hadıyev, gəncəli şəhid Elşən Böyükzadənin atası Böyük müəllim, şəmkirli şəhid Natiqin qardaşı Sabir Almədətov, müharibədə otuzdan çox doğmasını itirmiş kəlbəcərli Gülarə Hüseynova və başqaları çıxış edərək, bu təşəbbüsə görə Müdafiə Nazirliyinin rəhbərliyinə və təşkilatçılara minnətdarlıqlarını bildiriblər.
Mərasimin sonunda Silahlı Qüvvələrin Mahnı və Rəqs Ansamblının iştirakı ilə Murovdağ döyüşçüləri və şəhidlərinə həsr olunmuş «Ana, Murovdan gəlirəm» ədəbi-bədii kompozisiya təqdim olunub.
çap et