Azərbaycan Səfərbərlik və Hərbi Xidmətə Çağırış üzrə Dövlət Xidmətinin (SHXÇDX) «Hərbi Vətənpərvərlik və Mütəxəssis Hazırlığı» MMC tərəfindən hərbi xidmət çağırışçıları üçün ixtisas kursları yenidən bərpa olunacaq. Bu barədə ANS PRESS-ə SHXÇDX-nin «Hərbi Vətənpərvərlik və Mütəxəssis Hazırlığı» MMC-dən məlumat verilib.Cəmiyyətdən bildiriblər ki, hazırda aşpaz və sürücülük ixtisası üzrə mütəxəssislərin hazırlığı həyata keçirilir.
Snayper, kəşfiyyatçı, paraşütçü, kinoloq və digər kursların başlanması istiqamətində işlər davam etdirilir:
«Nazirlər Kabinetinin qərarı ilə bizə bu kursların yaradılması barəsində səlahiyyət verilib. Güc strukturları müəyyən sifarişlər verməlidirlər. Hərbi xidmət haqqında qanunda bildirilib ki, həmin ixtisaslar üzrə sifarişlər verilməlidir. Həmin sifarişlər üzrə də mütəxəssislər hazırlanmalıdır».
Cəmiyyətdən bildiriblər ki, snayper kurslarına müəyyən məhdudiyyətlər var. Belə ki, Nazirlər Kabinetinin qərarı ilə snayper ixtisası üzrə kurslarda yalnız çağırışçılar iştirak edə bilərlər. 17 yaşına çatmış hərbi çağırışçı snayper kurslarına cəlb oluna bilər:
«Adi vətəndaşların gəlib snayper kurslarına yazılması qeyri mümkündür. SHXÇDX-nin birbaşa vasitəçiliyi ilə bu kurslarda iştirak etmək olar. Kurslarda iştirak etmək üçün SHXÇDX-ə müraciət edilməlidir. Qanunvericiliyə görə, 17 yaşı tamam olub amma hərbi xidmətə hələ ki getməyən çağırışçılar snayper kurslarında iştirak edə bilərlər. Həmin şəxslər istək və arzusu nəzərə alınaraq həmin kurslara cəlb olunurlar».
Hazırda snayper kurslarında iştirak edəcək olan şəxslərin sayı məlum deyil. İştirakçıların sayı Nazirlər Kabineti tərəfindən təsdiq olunacaq.
Cəmiyyətdən bildiriblər ki, xanımların snayper kurslarına cəlb olunması məsələsi hələ ki, Nazirlər Kabinetinin qərarında öz əksini tapmayıb:
«Yalnız hərbi xidmət çağırışçıları bu kurslarda iştirak edə bilərlər. Qadınlar hərbi xidmətə çağırılmadıqları üçün bu kurslarda iştirak edə bilməzlər. Xanımların da bu kurslara cəlb olunmaları üçün gələcəkdə müəyyən addımlar atılacaq. Yəqin ki bununla bağlı müəyyən təkliflər hazırlanıb Nazirlər Kabinetinə təqdim olunacaq».
çap et