E-maillərdə nə var?

Ukraynalı hakerlər Rusiya rəsmilərinin electron ünvanlarını sındırdıqlarını iddia edirlər

Onlar «hack» etdikləri bir neçə e-mailin Rusiyanın hazırki siyasi sisteminin qurucularından biri olan Vladislav Surkova aid olduğunu iddia edirlər.

Cənab Surkov həmçinin Moskvanın Ukraynaya müdaxiləsi ilə bağlı Kremlin əsas fiqurlarından biridir.

Hakerlər iddia edirlər ki, onların Ukrayna dövləti və ya təhlükəsizlik xidməti ilə heç bir əlaqəsi yoxdur. Lakin onlar cənab Surkovun e-maillərini necə sındırmaqları barədə danışmaq istəməyiblər.

Hakerlər Ukraynanın şərqində 2014-cü ildən bəri Kiyevə qarşı vuruşan separatçıların Rusiya tərəfindən dəstəkləndiyinə inanırlar.

Moskva isə davamlı olaraq separatçı silahlılarla əlaqəsinin olmadığını bildirib münaqişənin «vətəndaş müharibəsi» olduğunu təkrar edir.

İddia olunur ki, sənədlər arasında Ukraynanın şərqindəki rusiyapərəst «respublikalar» üçün büdcə xərcləri göstərilir.

Eynilə üsyançıların nəzarətində olan bölgələrin yanacaqla təchizatına dair planların olduğu iddia edilir.

Rusiyapərəst qüvvələrin lideri Denis Puşilin tərəfindən göndərildiyi deyilən e-maildə üç regiona bölünmüş Ukrayna xəritəsinin olduğu qeyd edilir.

Xəritədə Ukraynanın şərqi «Novorossiya» (Yeni Rusiya) kimi göstərilir. Ukraynanın mərkəzi isə «Malorossiya» (Kiçik Rusiya) adı ilə qeyd olunur.

Ayrı-ayrılıqda e-maillər «son dərəcə dramatik» məlumat daşımır, lakin ümumilikdə götürülsə e-maillər əhəmiyyətli mənbədir, Britaniyalı jurnalist Eliot Hiqqins belə hesab edir.

«Biz bundan əvvəl Kremllə separatçılar arasında birbaşa əlaqənin olduğunu göstərən «hack» olunmuş məlumatları görməmişdik», jurnalist deyib.

Rusiyanın Tass xəbər agentliyi keçən həftə e-mail sızmaları ilə bağlı prezident Vladimir Putinin sözçüsü Dmitri Peskova istinadən yazıb ki, Vladimir Surkov e-mail işlətmir.

BBC ukraynalı hakerlərdən gördükləri işin nə qədər əxlaqi olması barədə soruşduqda onlardan biri «İnsanları silah və tanklarla öldürmək əxlaqidir? Məncə yox... «hack» etmək insan öldürməkdən daha əxlaqidir», - deyə cavab verib.

Rusiya hökuməti e-maillərdəki və bu məqalədə irəli sürülən bütün iddiaları rədd edir.