«Futbolçularımız əcnəbi klublara göndəriləcək»

H.Məmmədov qeyd edib ki, «Bakı» ilə «Atletiko» arasındakı əməkdaşlığın təməlini gənclər və idman naziri Azad Rəhimov qoyub: «Bu məsələdə AFFA prezidenti Rövnəq Abdullayevin də böyük xidmətləri var. Bizim bir çox layihələmiz «Atletiko»nun da istəyi ilə baş tutur. Tədbirdən əvvəl gənclərlə söhbət etdim. Bildirdim ki, siz ulu öndərimiz Heydər Əliyevin əsgərlərisiniz. İnanıram ki, onlar Azərbaycanın bayrağını daima ucaldacaqlar. «Atletiko» ilə əməkdaşlıq özü bir qürurdur».

H.Məmmədov deyib ki, «Bakı»nın əməkdaşlıq etdiyi Fransanın «Lans» klubunu düşərgəsinə də gələcəkdə Azərbaycandan futbolçular göndəriləcək: «Bütün yaş qruplarından olan futbolçularımızı ora göndərməyə hazırıq. Digər klublarımıza da müraciət edirəm ki, perspektivli futbolçuları varsa, göndərək, gedib, xarici ölkələrdə təhsil alsınlar».

Tədbirdə gənclər və idman naziri Azad Rəhimov «Bakı»nın aşağı yaş qrupu üzrə beş futbolçusunun Madrid «Atletiko»nun düşərgəsinə yola salmasına münasibət bildirərkən deyib ki, Azərbaycan idmanın gələcəyi üçün belə layihələr çox vacibdir:

«Bütün klub rəhbərləri bilməlidir ki, futbolun inkişafına uşaq futbolundan başlamaq lazımdır. Çox təqdirəlayiq haldır ki, bu gün «Bakı»nın 5 futbolçusu «Atletiko»nun akademiyasına təhsil almaq üçün gedir. Sevinirik ki, bu futbolçular seçilib. Onlar ən güclülərdir. İnanıram ki, bu gənclər 2016-cı ildə 16 yaşa qədər futbolçular arasında keçiriləcək Avropa çempionatında bizi layiqli təmsil edəcəklər. Heç vaxt yaddan çıxarmamalıdırlar ki, futboldan başqa onlar İspaniyada Azərbaycanı təmsil edəcəklər. Onlar Azərbaycan tarixini yaxşı öyrənməlidir ki, İspaniyada bizi tanıda bilsinlər».