Babək prospektindən Günəşli istiqamətində, eləcə də əks istiqamətdə körpünün üzərində yolun hərəkət hissəsi buz bağlayıb. Bu barədə Bakı Nəqliyyat Agentliyindən (BNA) məlumat verilib. «Bu səbəbdən də bir qədər əvvəl körpünün üzərində yol nəqliyyat hadisəsi baş verib», – deyə məlumatda qeyd olunub.***
Qarlı hava şəraiti «Azəravtoyol» ASC-nin balansında olan Bakının əsas magistral yollarında, o cümlədən paytaxtın giriş-çıxış yollarında heç bir problem yaratmayıb.
Bunu «Azəravtoyol» ASC-nin Mətbuat Katibliyinin rəisi Anar Nəcəfli bildirib.
A. Nəcəflinin sözlərinə görə, Bakı-Sumqayıt şosesi, Ziya Bünyadov prospekti, Heydər Əliyev prospekti, Bakı Dairəvi – 1 yolu, Bakıətrafı digər yollarda hər hansı problem müşahidə olunmur.
Bununla yanaşı, A. Nəcəfli qeyd edir ki, bəzi ərazilərə dövlət şirkətinin texnikası gedə bilmir:
«Söhbət bəzi tunellərdən, enişli-yoxuşlu yollardan gedir. Bəzi sürücülər hazırlıqlı olmadığından olduqca aşağı sürətlə hərəkət etdiyindən və ya yolda qaldığından tıxac yaranır, texnikamız həmin ərazilərə çata bilmir. Məcburiyyətdən oradakı işlər canlı qüvvəmiz tərəfindən aparılır. Əsas məqsəd odur ki, «nəqliyyat arteriyası» sayılan yollarda normal hərəkəti təmin edib, sonra digər yollara keçək. Hal-hazırda əsas yolların heç birində problem yoxdur. Bundan başqa, balansımızda olan digər yollarda əməkdaşlarımız təmizləmə işləri həyata keçirilir. Aparılan işlərə 400-dək müxtəlif təyinatlı texnika, texnika girə bilməyən yerlərə isə ASC-nin əməkdaşları cəlb olunub».
çap et