Müxalifət şübhələnir, hakimiyyət yalandır deyir

Ermənistan dəmir yolunu açmaq üçün Gürcüstanla gizli sövdələşmə əldə edibmi?

Virtualaz.org xəbər verir ki, müxalif «Vahid Milli Hərəkat» partiyası Abxaziyadan keçən dəmir yolunun açılması barədə razılaşma əldə olunmasından şübhələnir. «Əgər Abxaziyadan keçən dəmir yolu açılarsa, hansı ki, buna əsaslı şübhələr var, bu, Gürcüstanın ərazi bütövlüyünün bərpasını, qaçqınların öz evlərinə qayıtmasını və separatçı rejimlərin tanınmaması siyasətini istisna edir», - partiyanın nümayəndəsi Nika Rurua bildirib.

Müxalif siyasətçi deyib ki, Ermənistan baş nazirinin Gürcüstana səfəri zamanı Abxaziya dəmir yolunun açılması barədə danışıqların getməsinə dair ciddi şübhələr yaranıb. Onun sözlərinə görə, şübhələri Karapetyanın İrəvana qayıdıb Yuxarı Larsa alternativ iqtisadi yolun açılacağına dair bəyanat verməsi də təsdiq edir.

«Abxaziyadan keçən dəmir yolunun açılması tamamilə yolverilməzdir. Bu, Gürcüstanın ərazi bütövlüyünə ölümcül yara vuracaq, qaçqınların qayıtmasını istisna edəcək, suverenliyin bərpasını qeyri-mümkün edəcək», - siyasətçi bildirib. O, əlavə edib ki, Abxaziyadan keçən dəmir yolunun açılması milli maraqlara qarşı açıq-aşkar xəyanət olardı və ancaq Rusiyanın, bir də separatçıların işinə yarayır. «Habelə bu, bizim Azərbaycanla münasibətlərimizi korlayacaq, Poti limanından yükdaşımaları azaldacaq və Gürcüstanın iqtisadi durumunu pisləşdirəcək», - Rurua deyib.

Gürcüstanın energetika naziri Kaxa Kaladze isə müxalifətin tənqidlərinə cavab olaraq deyib ki, Karapetyanla danışıqlarda Abxaziya dəmir yolunun açılması müzakirə olunmayıb. «Müxalifət yalan danışır. Hökumətin gündəliyində belə layihə yoxdur, danışıqlarda bu barədə söhbət getməyib», - nazir bildirib.

Xatırladaq ki, Ermənistan Rusiya ilə quru əlaqəsini ancaq Gürcüstanı Şimali Osetiya ilə birləşdirən Yuxarı Lars yolu ilə yarada bilir. Həmin yol isə yayda sel və daşqınlara, qışda qar-çovğuna görə tez-tez bağlanır. Ermənistanda alternativ yol tapmaq üçün neçə vaxtdır çarəsiz cəhdlər edirlər.