«Quantanamo» bağlana bilər

«Prezident Quantanamo həbsxanasının bağlanması məsələsini yenidən qaldırıb və Quantanamodakı məhbusların təhvil verilməsində iştirak edən xüsusi təyinatlılara dəstəyini ifadə edib»,-deyə Ağ Evin mətbuat xidmətindən məlumat verilib.

Daha öncə Birləşmiş Ştatlar rəhbəri Quantanamonun bağlanması məsələsini Dövlət Departamenti və Pentaqon nümayəndələri ilə də müzakirə edib. 

Hazırda 2001-ci il 11 sentyabr hadisələrindən sonra yaradılan Quantanamo həbs düşərgəsinin nəzdində yaradılan həbsxanada terrorizmdə günahlandırılan 164 nəfər cəza çəkir. Onların yarıdan çoxu gələcək istintaq işi üçün ölkələrinə təhvil verilə bilər. 

2008-ci ildə hələ namizəd ikən Obama 2010-cu ildə Quantanamo həbsxanasının bağlanacağına söz verib. Ancaq 2011-ci ilin martında o, terrorizmdə günahkar bilinənlərə qarşı hərbi məhkəmələri bərpa edib. Ağ Ev rəhbəri həmçinin ABŞ təhlükəsizliyinə ciddi təhlükə yaradan şəxslərin heç bir ittiham irəli sürmədən və qeyri-müəyyən müddətə Quantanamoda saxlanılmasına icazə verən xüsusi sənədə imza atıb.

2013-cü ildə isə Obama həbsxananın fəaliyyətini qeyri-effektiv hesab etsə də, iyunda keçirilən səsvermə zamanı Konqres üzvləri bu qərarı dəstəkləməyib.