Martın 28-də axşam radələrində Ermənistan hakimiyyətinin ən güclü rəqiblərindən biri, «Ohanyan-Raffi-Oskanyan» seçki bloku İrəvanda izdihamlı yürüş-mitinq keçirib.Musavat.com bununla bağlı erməni mediasına istinadən xəbər verir.
Mitinqdən əvvəl «İrs» partiyasının sədr müavini Armen Martirosyan bəyan edib ki, onların məqsədi ölkədə köklü dəyişikliklərə nail olmaqdır. Onun təklifi ilə aksiya iştirakçıları rejim tərəfindən öldürülən «çörəkdaşıyan» Artur Sərkisyanın xatirəsini yad edib.
«Ölkədə inam olmadığı halda heç zaman investisiya olmayacaq». Bunu çıxışı zamanı sabiq müdafiə naziri, Serj Sərkisyanın keçmiş silahdaşı, bu gün isə qorxulu rəqibi Seyran Ohanyan deyib. Onun sözlərinə görə, 2 aprel parlament seçkisi ölkədə situasiyanı dəyişmək üçün 90-cı illərin əvvəllərində müstəqilliklə bağlı referendum qədər əhəmiyyətlidir. «Bu gün biz ədalətsizliyə, qanunsuzluğa «bəsdir» deməliyik».
Ohanyan aksiya iştirakçılarını məsuliyyətli adamları seçməyə çağırıb ki, «növbəti 5 ildə peşman olmasınlar».
Ermənistanın himnini oxumaqla çıxışa başlayan Raffi Ovannisyan isə iddia edib ki, onların mübarizəsi dirçəlişə gətirəcək.
«2 aprel siz öz uşaqlarızın gələcəyini seçəcəksiniz». Bunu isə keçmiş xarici işlər naziri Vardan Oskanyan deyib. O deyib ki, təmsil olunduğu blok qalib gəlsə, altı ay ərzində Ermənistan ən demokratik ölkələrlə bir sırada dayanacaq. «Bunun üçün resurslar yox, siyasi iradə lazımdır»-deyə, o, Qərbpərəst qüvvələrə mesaj verib.
«Azadlıq» meydanındakı izdihamlı mitinqin ardınca Seyran Ohanyan, Raffi Ovannisyan və Vardan Oskanyanın rəhbərliyi ilə Maştotsa prospekti boyunca yürüş başlayıb. Martirosyanın «bizə uğurlu yürüş və qələbə» sözlərindən sonra mitinq iştirakçıları hərəkətə keçib. Yürüş Respublika meydanı, Nalbandyan küçəsi, Sayat-Nova meydanına qədər davam edib və yenidən Azadlıq meydanında başa çatıb. Aksiyaya müdaxilə ilə bağlı hər hansı məlumat verilmir.
çap et