Naxçıvanda bahalaşma

Ümumi çəkisi 30 tondan artıq olan Azərbaycana məxsus avtomobillər İran tərəfinə buraxılmasa da, qarşı tərəfdən gələn İran avtomobillərinə yük məhdudiyyəti qoyulmur. Biləsuvar Gömrük İdarəsinin rəsmisi Mirrafiq Mirsultanovun verdiyi məlumata görə, Azərbaycan tərəfi beynəlxalq yükdaşıma standartı kimi qəbul olunmuş ümumi çəkisi 40 ton olan yük avtomobillərin maneəsiz keçidini təmin edir. Qarşı tərəfdən gələn iranlı sürücülərdən daşıdıqları yüklərin çəkisini soruşsaq da, onların əksəriyyəti müxtəlif vasitələrlə suallara cavab verməkdən imtina etdilər. Amma 30 tondan yuxarı yük gətirdiyini etiraf edən sürücülərə də rast gəlindi.

Amma cəmi 500 kq artıq yüklə Naxçıvana gedən azərbaycanlı sürücüyə məxsus avtomobil geri qaytarılaraq yükünün azaldılması tələb olundu. Səhər saatlarında 5-ə yaxın avtomobil yüklərin çəkisini azaldaraq qarşı tərəfə keçsələr də, 50-ə yaxın yanacaq daşıyan yük avtomobili hələ də Biləsuvar İran sərhədindədir.

Yanacaqla dolu olan bu yük avtomobillərində olan yüklərin çəkisini azaltmaq mümkün deyil, əgər bu yük avtomobillərində olan yüklərin çəkisi azaldılarsa, o zaman avtomobillərdə xoşagəlməz hadisələrə yol aça biləcək yüksək təzyiq yarana bilər.

Sürücülərin sözlərinə görə, çənlərdəki yanacağın azaldılması avtomobillərdə idarəetməni də xeyli çətinləşdirir.

Ən son məlumatlara görə, Culfa sərhəd buraxılış məntəqəsinin Naxçıvan tərəfində də 300-dən yuxarı yük avtomobillərinin növbəsi yaranıb. Qeyri-rəsmi məlumatlara görə, artıq Naxçıvanda yanacağın qiymətində artım müşahidə olunmağa başlayıb.