Ermənistan ordusunun əsgəri, bu il aprelin 25-də təmas xəttinin Talış kəndi istiqamətində yerləşən mövqelərindən birində tabeçiliyində olan pulemyotla özünü güllələyib intihar etdiyi deyilən Karen Avetisyan əslində öldürülüb. Virtualaz.org xəbər verir ki, bu haqda «Qraparak» qəzeti İrəvan sakini olan əsgərin qohumlarına istinadən yazır.

Bundan əvvəl Ermənistan İstintaq Komitəsi əsgərin səhər saat 5 radələrində pulemyotdan çənəsinə atəş açaraq intihar etdiyini açıqlamışdı. Lakin qohumları bu versiyanı rədd edib. «Birincisi, o, aprelin 26-nı gözləyirdi, həmin gün ata-anası Qarabağa gedib Karenin yanında bir gün qalacaqdılar. O, valideyinlərini səbrsizliklə gözlədiyi halda niyə intihar etməliydi? İkincisi, güllə onun sağ qulağının aşağı hissəsindən dəyib alnından çıxıb. İntihar edən özünə belə atəş aça bilməz. Nəhayət guya pulemyotu qulağına dirəyib və yandan dəyib alnından çıxan cəmi bir güllə atıb? Tamamilə aydındır ki, Kareni güllələyiblər», - qəzet yazır.