Qubad İbadoğlu başqanlıqdan danışdı

O, «Gündəlik Teleqraf» qəzetinə açıqlamasında söyləyib ki, iki partiyanın bir-birini təhqir etməsi yolverilməzdir: 

«Məhz buna görə də hər iki tərəfə çağırış etdim. Düzü, mətbuatı izləmədiyimdən bu çağırışı kimlərin necə qarşılandığından xəbərsizəm. Şəxsən özümlə əlaqə saxlayan olmayıb. Son günlər iki partiya funksionerlərinin dedikləri barədə məlumatım yoxdur. Amma belə bir hal xoşagəlməz idi. Mən də buna son qoyulmasını istədim. Hazırda qarşıdurma dayandırılıbsa bu, müsbət haldır». 

Q. İbadoğlu adının Müsavat başqanlığına namizəd kimi hallanmasına da aydınlıq gətirib. Divan üzvü başqanlıq barədə düşünməyin tez olduğunu bildirib: «İndi bu barədə danışmağa hazır deyiləm. Vaxtı çatanda öz mövqeyimi ifadə edəcəyəm. Hələ ki, belə iddialarım yoxdur».

Qeyd edək ki, Q. İbadoğlu sosial şəbəkələrdə AXCP və Müsavata barışıq çağırışı etmişdi. Onun çağırışına birmənalı münasibət olmasa da, hazırda partiyalar arasında atəşkəs elan edilib.