ABŞ-ın hazırda fəaliyyətdə olan Federal Təhqiqatlar Bürosu (FTB) agenti ekstremist cihadçı qrupların içərisinə soxularaq, onların planlarını aşkarlamaqla məşğuldur. Tamer Əl-Nuri (Tamer El-Noury) - bu, agentə məxsus olan bir çox saxta adlardan biridir. O, BBC ilə söhbətində hücumları planlaşdıran qrupların inamını qazanaraq, onların dairələrinə soxulması barədə danışıb.Dörd il əvvəl, o, əvvəl Nyu-York - Toronto qatar reysində qəza törətmək planının qarşısını almaqda mühüm rol oynayıb.
O, işi barədə kitab yazıb və bununla amerikalıları onun müsəlman agent kimi apardığı işlər barədə məlumatlandırmaq istədiyini deyib.
«Fakt budur ki, bu cihadçılar - göbələk kimi üzə çıxan bu radikallar - özünü itirmişlərdir», o, BBC-yə verdiyi müsahibədə deyib. «Onlar özlərinə məqsəd verən nifrət və pisliyə yapışırlar».
«Mən müsəlmanam və amerikalıyam və dinimi ləkələyən bu heyvanların mənim ölkəmə etdikləri məni dəhşətə gətirir», o, deyib.
«Qəfil görüş»
ABŞ-a Misirdən gələn köçkünlərin oğlu olan cənab Əl-Nuri «New Jersey»də polisə qoşulub və orada narkotik paylanma şəbəkələrinə qarşı əməliyyatlarda iştirak edib.
Bundan sonra, çox az sayda işçilərinin ərəb dilində danışdığını anlayan FTB tərəfindən işə qəbul edilib.
Onun iştirak etdiyi məxfi əməliyyatlardan birində, bir qrup şəxs Nyu-York - Toronto qatarını reysdən çıxararaq mümkün olduqca çox adamı öldürməyi planlaşdırırdı.
Cənab Əl-Nuri bu hücumu planlaşdıran tunisli köçkün Çiheb Esseqhayerlə (Chiheb Esseghaier) FTB-nin təşkil etdiyi bir «təsadüfi» görüşdə tanış olub.
Bir qədər sonra, Çiheb Esseqhayer ona hücumda iştirak etməyi təklif edib.
O özünü şəxsi bir nifrətə sahib olan varlı, ərəb əsilli amerikalı kimi təqdim edib. O bu personajı həqiqətə, mümkün olduqca oxşatmağa çalışdığını deyir.
«Mənim yaratdığım əfsanələr, uydurduğum hekayələrin heç biri həqiqətdən o qədər də uzaq olmayıb», o deyir.
«Dünyanı ideoloji ekstremistlərlə səyahət etdiyin zaman və onlarla günlər və həftələr keçirəndə, yorulduqca sənin həqiqi şəxsiyyətin üzə çıxır».
O deyir ki, işinin «ən çətin cəhəti» həftələrlə cihadçılarla qalıb özünü onların yaxın dostu kimi aparmaqdır.
«Mənim işim cihadçıları qucaqlamaqdır və əlbəttə ki, onların planlaşdırdıqları bu vəhşiliklər mənim üyərimi bulandırır».
«Məncə işimi yaxşı görməyin yeganə yolu onlarda xırda da olsa bir insani yaxşı cəhətə yapışmaqdır... anası ilə necə rəftar edir, bacı-qardaşlarının maddi qayğısı ilə necə məşğul olur».
Nyu-Yorka bir səfərdə cənab Esseqhayer «Times Square»də («Vaxt Meydanı») bir hücum planlaşdırmağa başlayıb. O bunun qatar hücumundan sonra baş verməsini istəyirdi, cənab Əl-Nuri CBS kanalının «Sixty Minutes» (Altmış Dəqiqə) verilişinə deyib.
Bu səfərdə o, cənab Esseqhayerlə Dünya Ticarət Mərkəzinin yerləşdiyi yerə gedib. Orada Esseqhayerin «ABŞ-a «daha bir 9/11 hücumuna ehtiyac olduğunu» deyəndən sonra, «mən qəzəblənərək az qala agent olaraq öz kimliyimi açıqlayacaqdım», o deyir.
Lakin bu planların heç biri reallaşmadı - 2013-cü ildə həm Esseqhayer, həm də ki, fələstin əsilli kanadalı Rid Ceyser (Raed Jaser) həbs edilib. 2015-ci ildə Əl-Nurinin araşdırması əsasında hər iki şəxs ömürlük həbs cəzasına məhrum edilib.
BBC təhlükəsizlik müxbiri Frank Qardener (Frank Gardener) deyir ki, cənab Əl-Nurinin hekayəsi gizli agentlərin təhlükəli və qaranlıq dünyalarına nadir bir pəncərədir.
Onun sözlərinə görə, FTB, öz agentini qorumaq üçün Frank Qardenerin müsahibiylə telefon danışığını dinləməkdə israr edib.
Bir agentin işi yalanlarla dolu olur. Lakin o, satqınlıq ittihamları ilə qürur duyduğunu deyir.
«Mənim dinimi ləkələyən bu radikallar, bu satqınlardır. Mən bir vətənpərvər olmağımla qürur duyuram və terrorla mübarizə aparan amerikalı müsəlman olmağımla qürur duyuram», o deyib.
Tamer Əl-Nurinin gizli agent həyatı barədə kitab – «Amerikalı Radikal» – «Penguin Random House» nəşriyyat evi tərəfindən oktyabrın 23-də dərc edilib.
çap et