Mayın 5-də İrəvandakı nümayişlərdə onlarla etirazçının saxlandığı xəbər verilir. Polis günortayadək 49 nəfərin saxlandığını bildirir. Televiziya kadrlarında isə təhlükəsizlik qüvvələrinin etirazçıları sürüyərək maşınlara basdığı görünür.
Parlament binası yaxınlığında vəziyyət gərgin olaraq qalıb. Bir gün öncə burada etirazçılarla polis əlbəyaxa olub. Yüzlərlə polis binanı mühasirəyə alıb.
***
İrəvanda müxalifət tərəfdarları mayın 5-də səhərdən etiraz aksiyalarını bərpa edib. Ötən gecə Ermənistan paytaxtındakı Fransa meydanında gecələyənlərə yeni gələnlər qoşulub, onlar şəhərin mərkəzi küçələrində yürüş ediblər.
Bu gün səhər Yerevanda bəzi küçələrin bağlanması, nəqliyyatın işinə maneə yaradan fəalların saxlanması barədə də məlumatlar gəlib.
Müxalifət Baş nazir Nikol Paşinyanı Dağlıq Qarabağ məsələsində Azərbaycana güzəştə hazır olmaqda suçlayaraq onun istefasını tələb edir.
Müxalifət mayın 1-dən “mübarizənin həlledici mərhələsi”nin başlandığını elan edib, tərəfdarlarını kütləvi vətəndaş itaətsizliyinə çağırıb. Ertəsi gündən gündəlik etiraz aksiyaları başlanıb.
Hakimiyyət təmsilçiləri isə baş nazirin istefası tələblərini rədd edir, bu tələbi əhalinin geniş təbəqələrinin dəstəkləmədiyini bildirir.
***
Paşinyan ötən ay Azərbaycan Prezidenti İlham Əliyevlə Brüssel görüşündə Dağlıq Qarabağ münaqişəsinin həlli üzrə ikitərəfli sülh sazişinin hazırlanmasına başlamağa və sərhədlərin delimitasiyası üzrə birgə komissiya yaratmağa razılaşıb.
Bakı sülh sazişi üçün beş prinsip, o cümlədən bir-birinin ərazi bütövlüyünün qarşılıqlı tanınmasını irəli sürüb. Paşinyanın bu elementlərin İrəvan üçün əsasən qəbuledilən olduğunu deməsi müxalifəti qızışdırıb. Onlar baş naziri Dağlıq Qarabağ üzərində Azərbaycanın suverenliyini tanımağa hazır olmaqda suçlayırlar.
çap et