Urmiya Universiteti Nəşrlərə Nəzarət Komitəsi daha əvvəl nəşrinə 6 aylıq qadağa qoyduğu Dəniz adlı «türkcə-farsca öyrənci dərgisi»nin daimi olaraq qapadılmasına dair qərar çıxarıb.

Nəzarət Komitəsinin dərginin direktoru Yasir Rəncbəriyə unvanladığı məktubda yazılanlara görə, «etnik məsələləri qaldırmaq, milli birliyə zərər vermək kimi xətalar və 14-cü sayıda Latin əlifbasından istifadə etdiyi üçün Dəniz dərgisinin daimi olaraq qapadılmasına qərar verilib.

Amerikanın Səsinin əldə etdiyi məlumata görə, universitet məsulları daha əvvəl Atatürkün şəklinin dərginin qapağında dərc edilməsi, həmçinin Seyid Cəfər Pişəvəri haqqında yazıların yayılması ilə əlaqədar dərgi əməkdaşlarına xəbərdarlıq vermişdilər.

Güneyli fəallar keçən 20 ildə universitetlərdə türk dilində yayılan tələbə dərgilərinin gənclər arasında milli şüurun yüksəlməsində önəmli rol oynadığını önə çəkirlər.