Elnur Aslanovun nəzarətində fəaliyyət göstərən news.az saytının sahibi dəyişib. Aktual.az xəbər verir ki, bu haqda yerli domenlərin satışı və qeydiyyatı ilə məşğul olan «NT» şirkətinin whois.az saytında məlumat yenilənib.

Saytın yeni sahibi Anar Məmmədova məxsus Garant Media Holdingdir. Bu günə qədər sayt Elnur Baimovun adına olsa da, Elnur Aslanovun himayəsində fəaliyyət göstərirdi.

Xatırladaq ki, bir müddət əvvəl Anar Məmmədovun nümayəndəsi bildirmişdi ki, Garant Media Holdingə daxil olacaq saytların adları yaxın vaxtlarda açıqlanacaq. News.az Holdingin adına rəsmiləşdirilən ilk sayt olub.

Uzun müddət Elnur Aslanovun nəzarətində olan gun.az informasiya agentliyinin də təsisçisi dəyişib. Bu haqda da whois.az saytında məlumat yenilənib.

Saytın yeni təsisçisi gun.az saytının məsul redaktoru Emil Quliyev olub. O, Elnur Baimovu əvəzləyib.

Qeyd edək ki, Emil Quliyev həm də Franspress agentliyinin ölkəmizdəki təmsilçilərindəndir.