Ermənistanın Gümrü qəsəbəsində yerləşən 19 saylı məktəb şagirdlərinin iştirakı ilə flaşmob keçirilib. Məktəb direktorunun tapşırığı ilə həyətdə, məktəbliləri “Z” hərfi şəklində düzüblər. Müdiriyyəti onlara həm də üzərində “Z” yazılmış vərəqlər paylayıb.

Bu rus məktəbi Rusiyanın Gümrüdəki 102-ci hərbi bazasının ərazisində yerləşir və Rusiyanın Müdafiə Nazirliyinin tabeçiliyindədir.

Rusiya Müdafiə Nazirliyinin icazəsi olmadan bu bazanın ərazisində hər hansı çəkilişin aparılması qadağandır. Məktəbdə Rusiya hərbçilərinin uşaqları ilə yanaşı erməni uşaqlar da oxuyur.

Bu hadisə Ermənistanda Kremlə dəstək məqsədilə keçirilmiş yeganə tədbir deyil.

Həftənin əvvəllərində Rusiyanın İrəvandakı səfirliyinin qarşısında Ukraynaya müdaxiləni dəstəkləyən aksiya keçirilib.

Bir həftə bundan qabaq isə “Rossia Today”in redaktoru Marqarita Simonyan öz sosial şəbəkə səhifələrində postamentində qırmızı işıqlarla “Z” yazılmış Ermənistandakı “Ana” abidəsinin videosunu paylaşıb. Bu video “Z” hərfi ilə başlanıb “V” hərfi ilə bitir.

Qeyd edək ki, Ukraynaya müdaxilə edən Rusiya hərbi texnikasının üstündə bu hərfin də yazıldığını görmək olar.