Çexiya XİN Rusiya diplomatlarına onları Ukrayna müharibəsinə dəstək verməməyə çağıran açıq məktub yazıb. “Reuters” xəbər verir ki, məktub aprelin 1-də XİN-in “Twitter” hesabında ingilis və rus dillərində dərc olunub.

“Appeal to Russian colleagues, diplomats, men and women of the Russian diplomatic service. Colleagues, we implore those of you who have a conscience and who maintain the capacity to recognize evil: take yourself out of this circle of accomplices. #StopPutinsLies Appeal — Czech MFA (@CzechMFA) April 1, 2022”

Məktub Rusiyanın yalnız Çexiyadakı deyil, bütün dünya boyunca xidmətdə olan diplomatlarına üznvanlanıb.

Məktubda diplomatlara “həmkarlarımız” deyə müraciət olunur: “Biz siyasi elitanın milli maraqlara zidd hərəkət etdiyini dərk etməyə qabilik. Yəqin bir çoxlarınız dərk etmisiniz ki, dövlətinizin rəhbərliyi sizi aldadıb”.

Məktubda Rusiyanın Ukraynada başlatdığı müharibənin gətirdiyi dağıntılardan, dinc insanların həlak olmasından bəhs olunur.

***

Məktub müəlliflərinin fikrincə, Rusiyada “korrupsiyalaşmış və gerontokratiyaya çevrilən” hakimiyyətin günahı üzündən ölkə “keçmişin qaranlığına” yuvarlanır.

Bu da qeyd olunur ki, Rusiya rəhbərliyini sonda hərbi cinayətlərə görə məsuliyyət gözləyir.

Məktubda rusiyalı diplomatlara “şərə qulluq edənlərin” çevrəsindən çıxmaları və “batmaqda olan gəmini” tərk etmələri üçün “yalvarış” edilir.

Rusiya XİN və Rusiyanın Çexiyadakı səfirliyi məktuba hələ ki, reaksiya verməyiblər.

Çexiya Rusiyanın Ukraynaya müdaxiləsinə qarşı qızğın mübarizə aparan ölkələrdən biridir.

Çexiyanın baş naziri Petr Fiala müdaxilənin əvvəlində Kiyevə səfər edən azsaylı ölkə başçılarından biri olub.

Çexiyada Rusiyanın Ukraynaya qarşı müharibəsinə çoxsaylı və izdihamlı etiraz aksiyaları keçirilir, Ukrayna qaçqınlarına hər cür qayğı göstərilir.