Avropa Şurası Parlament Assambleyasının (AŞPA) sədri Ann Brassör 20 iyun Ümumdünya Qaçqınlar Gününün həqiqi fəaliyyətə keçmək üçün yaxşı imkan olduğunu bildirib. «Dünyanın bir çox nöqtəsində, o cümlədən Avropada münaqişələr tüğyan edir və qaçqınlar, məcburi köçkünlər, eləcə də siyasi mühacirlərin artmasına şərait yaradır. Avropa öz sərhədlərini həyatları təhlükədə olan və müdafiə axtaran insanlar üçün qala divarlarına çevirməməlidir», - deyə o əlavə edib.

Xanım Brassör üzv ölkələrə qaçqınları qorumaq üçün götürdükləri beynəlxalq öhdəlikləri xatırladıb.

Sədr Brassörə görə, «zülmdən qaçan insanlar qəhrəmanlardır, onları cəzalandırmaq yox, mükafatlandırmaq lazımdır». O, Avropaya gəlməyin qanuni kanallarının yaradılmalı olduğunu düşünür.