Özbəkistan xüsusi xidmət orqanları prezident İslam Kərimovun qızı Gülnarə Kərimovanın yaxın ətrafına daxil olan daha bir neçə şəxsi həbs edib.

Virtualaz.org saytı Orta Asiya qaynaqlarına istinadən xəbər verir ki, həsb olunanlar Gülnarənin «sağ əli» hesab edilən erməni Qayane Avakyan, Rüstəm Madumarov və Yekatrina Klyuyevadır. Onlar Gülnarə Kərimovaya məxsus olan və vergidən yayınmaqda, digər iqtisadi cinayətlərdə ittiham olunaraq bağlanan şirkətlərin işi üzrə cinayət işi çərçivəsində həbs ediliblər.

Həbs olunanlardan Rüstəm Madumarov Gülnarənin vətəndaş nikahında olan əri hesab olunur və mağazalar şəbəkəsini idarə edib. 2013-cü ilin payızında onu bir dəfə saxlayıb dindirmişdilər.

Erməni Qayane Avakyan isə G.Kərimovanın İsveç telekommunikasiya şirkəti «TeliaSonera»dan yüz milyonlarla dollar rüşvət alması işində əsas fiqurantlardan biridir. İsveç prokurorluğu onun bank hesablarına və əmlakına həbs qoyub.

Xatırladaq ki, ötən ilin sentyabrından Özbəkistan xüsusi xidmət orqanları prezidentin qızının şirkətlərini bağlayıb, adamlarını həbs edib, özünü isə faktiki ev dustağı edib. G.Kərimova isə ona qarşı təqiblərə Twitter vasitəsilə atasının hakimiyyəti, anası və kiçik bacısı Lola, onun əri barədə ifşaedici məlumatlar yaymaqla cavab verirdi.

Lakin bu ilin yanvarından G.Kərimova ilə atası arasında «müharibə» nisbətən səngimişdi. G.Kərimova yazmışdı ki, atası ilə barışıb və yeni incəsənət layihələri üzərində işləyir.