Bunu Modern.az-a Azərbaycan Milliyyətçi Demokrat Partiyasının (AMDP) yaradıcılarından olan Qələndər Muxtarlı partiyadan qovulması ilə bağlı iddialara münasibət bildirərkən deyib. O bildirib ki, 2000-ci ildən sonra bir müddət partiyaya getməyib: «2005-ci ildə İsgəndər Həmidov azad olunandan sonra qayıtdım. Həmin ilin sentyabrında Türkiyədə olduq. Yəni, partiyadan özüm getmişəm. Eyni qayda ilə İsgəndər Həmidov partiyanı tərk etdi. Mənim getməyimə hansı hadisələr səbəb idisə, Həmidov üçün də həmin hadisələr səbəb idi. Sonra Ümid Partiyasına getdim. İqbal bəylə yaxın münasibətlərimiz var. Bu gün də davam edir. Ona təşkilatlanmaqda müəyyən qədər köməyim oldu. İqbal bəy də bilirdi ki, onlara bir müddət kömək etmək üçün gəlmişəm. Oradan da dost kimi ayrılmışıq. Sonra təkrarən AMDP-yə gəldim. Bu dəfə də təşkilat komitəsi yaradılanda dedim ki, komitədə olmaq fikrim yoxdur. Məsələ belə olub. İndi bu cür açıqlamaları təəccüblə qarşılayıram. Kim necə istəyirsə, o cür  də desin. Hər cür böhtan, şər deyilə bilər».

Q.Muxtarlı AMDP-nin qurucularından olan, sabiq daxili işlər naziri İsgəndər Həmidovun son müsahibəsində onun haqqında dediklərinə isə münasibət bildirmək istəməyib: «Bu barədə, ümumiyyətlə, danışmaq istəmirəm. Birtərəfli qaydada açıqlamaları dayandırmışam. Sadəcə, Rauf Arifoğluna təşəkkür edirəm, istəyinə nail oldu.  Bundan sonra İsgəndər Həmidovun açıqlamalarını izləyəcəm».