Prezident İlham Əliyevin ADA Universitetindəki nitqi Almaniyanın birliyinə nail olmuş kansler Helmut Kolun birlikdən əvvəlki çıxışlarına bənzəyir.

O zaman bir kansler üçün birləşmənin qarşısını almaq ona nail olmaqdan daha asan olardı.  Fransua Mitteran, Marqaret Tetçer, Rud Lubbers, Culio Andreotti – demək olar ki, Avropa liderlərinin hamısı alman birliyini rədd edirdi. Və xəstə Sovet İttifaqının öz peykindən imtina etməyə hazır olub-olmadığını yalnız təxmin etmək olardı. 

Helmut Kol inam yaratmaqda usta olduğunu sübut etmiş bir lider idi. Məhz bu ustalığın sayəsində birləşmədən altı ay əvvəl hamı başa düşdü ki, Almaniyanın dinc yolla birləşməsi Avropa üçün böyük fürsətdir. Qorbaçov bu birliyə yol açmaq müqabilində Koldan milyardlar aldı və beləcə Almaniyanın birliyinin əleyhinə olan qonşular pat vəziyyətində qaldllar.

Türkiyədən başqa qonşularımızın demək olar ki, hamısı Azərbaycanın birliyinin əleyhinə olarlar. Helmut Kolun birlik siyasəti Sosialist Almaniyasında yaşayan almanları himayə etməklə başlayıb. Bundan sonra Kol dünya almanlarının liderinə çevrildi. Nəyi, nə zaman etməyi bacaran kansler Almaniyanın tarixindəki rolu qızıl hərflərlə yazılıb.

Quzeyin bütövləşməsi prosesi bütün Azərbaycanın bütövləşməsi fürsətini gücləndirib. İnam yaratmaq ustası İlham Əliyevə olan inamın sərhədləri artıq ölkə sərhədlərini aşıb. Güneyli-quzeyli Azərbaycanlıların liderinə çevrilməyi bacaran İlham Əliyev artıq güneyimizdə ən çox tanınan və sevilən liderdir. 

İndiki ağır şəraitdə güneyli soydaşlarımız intizarda qalmadılar. Çox güman ki, rəsmi Tehran bundan sonra Azərbaycan türklərinin doğal haqqlarını qaytarmağa çalışacaq, ən azından ana dilində təhsil almaq haqqını bərpa edəcək.