İran və İsrail arasında qarşılıqlı hücumların davam etməsi, həmçinin kövrək atəşkəsin pozula biləcəyi ilə bağlı narahatlıqlar bazarları yenidən hərəkətə gətirib. Bu gün səhər dünya neft qiymətləri bazar ertəsi günü kəskin yüksəlib.

VAXT.AZ “Bloomberg”ə istinadən xəbər verir ki, “Brent” markalı neftin qiyməti 3,18 faiz artaraq bir barel üçün 96,05 dollara yüksəlib. ABŞ-nin “WTI” markalı xam nefti isə 3,46 faiz bahalaşaraq bir barel üçün 93,67 dollar olub.

Analitiklər qeyd edirlər ki, Yaxın Şərqdə gərginliyin yenidən artması enerji təchizatında mümkün fasilələrə dair narahatlıqları gücləndirib və bu da neft qiymətlərinə əlavə dəstək verir.

Bununla yanaşı, yaranan təchizat böhranı fonunda OPEC+ ölkələri bazar günü son dörd ayda dördüncü dəfə neft hasilatının artırılması barədə qərar qəbul ediblər.

Lakin ekspertlər hesab edirlər ki, Hörmüz boğazı ətrafında risklərin davam etməsi və Rusiyanın enerji infrastrukturuna yönəlmiş hücumlar səbəbindən bir sıra OPEC+ üzvləri planlaşdırılan hasilat səviyyələrinə çata bilmirlər. Buna görə də təşkilatın son qərarının bazara təsirinin məhdud olacağı gözlənilir.