Azərbaycan Turizm Bürosu Asiya bazarında fəaliyyətini genişləndirir. Büronun ən böyük yeni təşəbbüslərindən biri kimi Pekində nümayəndəliyin açılması olub. Bu gün Mayın 29-da Çin Xalq Respublikasının paytaxtı Pekində Azərbaycan Turizm Bürosunun rəsmi nümayəndəlik ofisinin açılışı mərasimi keçirilib.

VAXT.AZ “TTG Asia” nəşrinə istinadən xəbər verir ki, yeni ofisdə Azərbaycanı tanıdan xüsusi ziyarətçi mərkəzi də fəaliyyət göstərəcək. Məqsəd Çin bazarında həm tərəfdaşlarla, həm də turistlərlə birbaşa əlaqələri gücləndirməkdir.

Azərbaycan Turizm Bürosunun İdarə Heyətinin sədri Florian Zenqstşmid bildirib ki, Pekində ofis açılması Çin və Azərbaycan arasında tətbiq edilən qarşılıqlı vizasız rejimlə birbaşa bağlıdır: “Çində münasibətləri inkişaf etdirmək istəyiriksə, fiziki olaraq burada təmsil olunmağın vacib olduğunu düşünürük”.

Onun sözlərinə görə, Azərbaycan Turizm Bürosu artıq Çin bazarında hazırlıq işlərinə başlayıb. Bu çərçivədə “Trip.com” və “Fliggy” kimi iri turizm platformaları ilə əməkdaşlıq edilir.

Bundan əlavə, Azərbaycan hotelləri və bələdçiləri üçün “Çin bazarına uyğun hazırlıq” proqramı hazırlanıb ki, bu da çinli turistlərə uyğun xidmət keyfiyyətinin artırılmasına yönəlib.

Turizm Bürosunun təşəbbüsləri yeni hava əlaqələri ilə dəstəklənir. Hazırda Azərbaycan Hava Yolları (AZAL) və “China Southern Airlines” (“Çin Cənub Hava Yolları”) arasında birbaşa uçuşlar həyata keçirilir.

Bundan əlavə, yaxın vaxtlarda “China Eastern Airlines” (“Çin Şərq Hava Yolları”) tərəfindən Şanxay–Bakı marşrutu üzrə yeni yay reyslərinin açılması gözlənilir.

Florian Zenqstşmid qeyd edib ki, Çin Azərbaycanın Asiya strategiyasının yalnız bir hissəsidir. Onun sözlərinə görə, Malayziya, İndoneziya, Vyetnam, Cənubi Koreya və Yaponiya da prioritet bazarlar sırasındadır.

Turizm rəsmisi bildirib ki, son səkkiz ildə Asiya Azərbaycanın turizm siyasətində ciddi əhəmiyyət qazanıb və regionla nəqliyyat əlaqələri də xeyli yaxşılaşıb.

Zenqstşmid hesab edir ki, Asiyada Azərbaycana marağın artmasında beynəlxalq tədbirlərin də mühüm rolu var.

O qeyd edib ki, iki il əvvəl BMT-nin İqlim Dəyişikliyi Konfransının (COP29) Bakıda keçirilməsi ölkənin beynəlxalq imicini gücləndirib.

May ayında Bakının həmçinin XIII Dünya Şəhərsalma Forumuna (World Urban Forum – WUF13) ev sahibliyi etdiyi vurğulanıb.