Tayland Konstitusiya Məhkəməsi, vəzifədən kənarlaşdırılan baş nazir Paetonqtarn Şinavatranı keçmiş Kamboca baş naziri və Senat sədri Hun Sen ilə telefon danışığında etik qaydaları pozduğu əsas gətirilərək vəzifədən uzaqlaşdırdı.

Kamboca və Tayland arasında sərhəd gərginliyinin ardınca qərara bağlanan işlə Şinavatra ölkədə Konstitusiya Məhkəməsi tərəfindən son 17 ildə vəzifədən alınan beşinci baş nazir oldu.

Şinavatranın yerinə müvəqqəti gətirilən baş nazirin müavini və müdafiə naziri Phumtam Veçayaçay rəhbərliyindəki kabinetin, parlament yeni baş naziri təsdiqləyənə qədər fəaliyyətini davam etdirməsi gözlənilir.

“The New York Times”ın təhlilində, Paetonqtarn haqqındakı qərarla Şinavatra ailəsindən seçilən üçüncü baş nazirin də postunu itirdiyinə diqqət çəkilir.

39 yaşlı Paetonqtarn Şinavatra, qərardan sonra paytaxt Banqkokda etdiyi açıqlamada deyib: “Bir daha məhkəmə qərarı ilə siyasi mənzərə qəfil dəyişdi”.

Paetonqtarnın atası Taksin Şinavatra 2006-cı ildə ikinci müddətə yenidən seçildikdən qısa müddət sonra çevrilişlə vəzifədən uzaqlaşdırılmışdı. Xalası Yinqlak Şinavatra isə 2014-cü ildə, başqa bir çevrilişdən bir neçə həftə əvvəl Konstitusiya Məhkəməsi tərəfindən postundan kənarlaşdırılmışdı.

Digər tərəfdən, təhlildə qeyd olunur ki, Taksin və Yinqlak barədə qərarlardan sonra böyük etirazlar keçirilmişdi, amma Paetonqtarnın vəzifədən uzaqlaşdırılması eyni təsiri yaratmayacaq.

Sinqapurda “Nanyang Texnologiya Universiteti”ndən Tayland üzrə ekspert Dankan Makkarqo bildirir ki, Şinavatra ailəsi əvvəlki ilə müqayisədə xalq arasındakı dəstəyini itirməyə başlayıb.

2023-cü ilin mayında keçirilən ümumi seçkilərdə islahatçı “İrəli Hərəkat Partiyası” (Move Forward Party/MFP) qalib gəlmişdi. Ancaq Konstitusiya Məhkəməsi parlamentdə baş nazir seçkisindən bir neçə saat öncə MFP lideri Pita Limcaronrat-ın deputatlığını dayandırmışdı. Daha sonra Konstitusiya Məhkəməsinin qərarı ilə partiya bağlanmışdı.

Haqqında 8 il həbs cəzası çıxarılan Taksinin qurduğu “Taylandlılar üçün Partiya” (Pheu Thai Party – PTP) isə may seçkilərində ikinci yeri tutmuşdu. Şinavatra fevralın 17-də şərti azadlığa buraxılmışdı.

“PTP”nin 10 siyasi partiya ilə qurduğu koalisiyanın ortaq namizədi, daşınmaz əmlak maqnatı Srettha Tavisinq, iclaslar nəticəsində çoxluğu əldə edərək baş nazir seçilmişdi. Ancaq Konstitusiya Məhkəməsi “kabineti formalaşdırarkən etik qaydaları pozduğu” səbəbilə Sretthanı ötən ilin avqustunda vəzifədən azad etmişdi.