Beynəlxalq Cinayət Məhkəməsinin ən yüksək inzibati orqanı baş prokuror Kərim Xan barəsində irəli sürülən cinsi qısnama ittihamları üzrə aparılan araşdırmadan sonra onun səlahiyyətlərinin müvəqqəti dayandırıldığını açıqlayıb.

VAXT.AZ “Reuters”ə istinadən xəbər verir ki, qərar Xanın taleyi ilə bağlı üzv dövlətlər arasında keçiriləcək səsverməyədək qüvvədə olacaq.

Məsələyə yaxın olan diplomatik mənbənin bildirdiyinə görə, məhkəmənin icraedici orqanı Xanın ciddi intizam pozuntusuna yol verdiyi qənaətinə gəlib. Mənbənin sözlərinə görə, bu nəticə Xanın ofisində çalışan qadın hüquqşünasla onun razılığı olmadan cinsi münasibətdə olması ilə bağlı iddialar üzrə 18 ay davam edən araşdırmadan sonra əldə edilib.

Araşdırma çərçivəsində Xanın vəzifə səlahiyyətlərindən sui-istifadə etdiyi qənaətinə gəlindiyi bildirilir.

Baş prokuror isə ona qarşı irəli sürülən ittihamları davamlı olaraq rədd edir.

Məlumata görə, araşdırmanın yekun hesabatı Beynəlxalq Cinayət Məhkəməsinin 125 üzv dövlətinə göndəriləcək. Bundan sonra üzv ölkələrin Xanın vəzifədən tamamilə uzaqlaşdırılıb-uzaqlaşdırılmaması məsələsi ilə bağlı səsvermə keçirməsi gözlənilir.

Beləliklə, Kərim Xanın yekun taleyi üzv dövlətlərin verəcəyi qərardan asılı olacaq.