2026-cı ilin birinci rübündə Rusiyada baş verən yanğınlar nəticəsində 3025 nəfər həyatını itirib. Bu, ən azı son səkkiz ildə qeydə alınan ən yüksək göstəricidir.

VAXT.AZ xəbər verir ki, məlumat Federal Statistika Sistemi (Fedstat) tərəfindən dərc olunub.

2025-ci ilin eyni dövrü ilə müqayisədə yanğınlarda ölənlərin sayı 783 nəfər və ya təxminən 35 faiz artıb. Bundan əvvəl ən yüksək göstərici 2021-ci ilin ilk rübündə qeydə alınmışdı. Həmin vaxt yanğınlar nəticəsində 2 986 nəfər ölmüşdü.

2026-cı ilin yanvar-mart aylarında yanğınlar zamanı 3103 nəfər xəsarət alıb. Bu, ötən ilin analoji dövrü ilə müqayisədə 46,7 faiz çoxdur.

Yanğınların ümumi sayı da rekord həddə çatıb. İlin ilk üç ayında Rusiyada 94 529 yanğın qeydə alınıb. Müqayisə üçün, 2025-ci ilin birinci rübündə bu göstərici 65 746 olmuşdu.

Rusiya hakimiyyəti son aylarda Ukrayna pilotsuz uçuş aparatlarının zərbələrindən sonra baş verən yanğınlar barədə mütəmadi məlumat verir. Yalnız son sutka ərzində sənaye obyektlərində üç regionda yanğın baş verib: Krasnodar diyarı, Astraxan vilayəti və Yaroslavl.

“Reuters” agentliyinin məlumatına görə, mart ayında Ukrayna Rusiyanın neft və yanacaq infrastrukturuna hücumları gücləndirib. Nəticədə Novorossiysk, Primorsk və Ust-Luqa limanlarında yerləşən iri ixrac terminalları zərər görüb.

Bu limanlar Rusiyanın neft ixracında mühüm rol oynayır və onlara hücumlar ölkənin enerji infrastrukturuna ciddi təsir göstərib.