Dünyada nüvə silahlarına ayrılan vəsait 2025-ci ildə tarixi rekord yeniləyib. Nüvə Silahlarının Ləğvi üzrə Beynəlxalq Kampaniya (ICAN) tərəfindən dərc olunan yeni hesabata görə, nüvə silahına malik doqquz dövlət ötən il öz nüvə arsenalına ümumilikdə 118,8 milyard dollar xərcləyib.

VAXT.AZ xəbər verir ki, “2025-ci ildə nüvə silahlarına xərclər” adlı hesabata görə, bu məbləğ əvvəlki illə müqayisədə 16,8 milyard dollar və ya təxminən 19 faiz çoxdur. Hesabata görə, nüvə dövlətləri nüvə silahlarına orta hesabla saniyədə 3768 dollar xərcləyirlər.

ICAN qeyd edir ki, ən böyük xərcləri ABŞ edib. Vaşinqtonun nüvə proqramlarına ayırdığı vəsait 69,2 milyard dollar təşkil edib ki, bu da digər bütün nüvə dövlətlərinin birlikdə xərclədiyi məbləğdən çoxdur. ABŞ eyni zamanda illik artım üzrə də lider olub və bir il ərzində xərclərini 12,4 milyard dollar artırıb.

Çin 13,5 milyard dollarla ikinci, Böyük Britaniya isə 12,6 milyard dollarla üçüncü yerdə qərarlaşıb. Beləliklə, London nüvə xərclərinə görə 9,5 milyard dollarlıq göstərici ilə çıxış edən Rusiyanı geridə qoyub.

Hesabatda Fransanın nüvə silahlarına 7,7 milyard dollar, Hindistanın 2,8 milyard dollar, Pakistanın 1,5 milyard dollar, İsrailin 1,2 milyard dollar, Şimali Koreyanın isə 656 milyon dollar xərclədiyi qeyd olunur.

ICAN-ın hesablamalarına görə, son beş ildə nüvə silahına malik ölkələrin ümumi xərcləri 471 milyard dollara çatıb. Təşkilat bildirir ki, nüvə dövlətləri bir tərəfdən arsenallarını modernləşdirir və genişləndirir, digər tərəfdən isə yaxın onilliklərdə bu sahəyə daha çox vəsait ayrılacağını planlaşdırırlar.

Hesabat müəllifləri hesab edirlər ki, bu vəsaitlər humanitar problemlərin həllinə yönəldilə bilərdi. Sənəddə vurğulanır ki, nüvə silahlarına bir günlük xərclənən məbləğ təxminən 2 milyon insanı ərzaq çatışmazlığından xilas etməyə, bir dəqiqəlik xərc isə minlərlə insana təmiz su və sanitariya xidmətləri təmin etməyə kifayət edərdi.

ICAN-ın proqramlar direktoru Syuzi Snayder bildirib ki, həyat bahalaşmasının artdığı və milyonlarla insanın əsas ehtiyaclarını ödəməkdə çətinlik çəkdiyi bir dövrdə nüvə silahlarına milyardlarla dollar sərf olunması narahatlıq doğurur.

Təşkilatın hesabatında vurğulanır ki, nüvə silahlarına ayrılan rekord vəsaitlər qlobal təhlükəsizlik mühitində gərginliyi daha da artırır və yeni silahlanma yarışını təşviq edir.