Fransa hökuməti 2026-cı ildən qüvvəyə minməsi planlaşdırılan yeni vergi islahatı ilə pensiya gəlirlərinə tətbiq olunan “Contribution Sociale Généralisée” (CSG) – yəni sosial töhfə vergisinin gəlir dilimlərini dondurmağı nəzərdə tutur.

Vaxt.AZ yerli mediaya istinadən xəbər verir ki, hazırda CSG vergisi pensiya gəlirinə görə dəyişir – ən aşağı gəlirli təqaüdçülər bu vergidən azaddır, yüksək gəlir qrupundakılar isə 8,3%-ə qədər vergi ödəyirlər. Lakin hökumətin planına əsasən, bu gəlir dilimlərinin inflyasiyaya uyğun şəkildə hər il yenilənməsi prosesi dayandırılacaq.

Yeni sistem xüsusilə gəliri dilim sərhədində olan pensiyaçıları zərbə altında qoyacaq. Məsələn, gəlirində cüzi artım olan şəxs mövcud dərəcədən daha yüksək CSG faizinə keçə bilər. Nəticədə nominal təqaüd dəyişməyəcək, əksinə tutulmaların artması ilə xalis gəlir azalacaq.

Fransa Maliyyə Nazirliyinin məlumatına görə, bu dəyişiklik on minlərlə təqaüdçünün gəlirinə birbaşa təsir edəcək. 2025-ci ildə illik gəliri 12 817 avrodan az olan təqaüdçülər CSG-dən azad idi. 12 818–16 755 avro aralığında gəliri olanlar 3,8%, 16 756–26 002 avro arası qazananlar isə 6,6% vergi ödəyirdi. Gəlir sərhədlərinin “dondurulması” bu qazancların yüksəlməyəcəyi deməkdir və amma əvəzində daha çox pensiyaçı yüksək vergi kateqoriyasına düşəcək.

Təqaüdçü birlikləri islahatı dolayısı ilə təqaüdün azaldılması kimi qiymətləndirir. Onların fikrincə, hökumət bu addımı inflyasiyaya qarşı mübarizə bəhanəsi ilə atır və sosial ədaləti pozur.
Əgər islahat qəbul edilərsə, Fransa təqaüdçüləri 2026-cı ildən etibarən alıcılıq qabiliyyətində ciddi azalma ilə üzləşəcək.