Heydər Əliyev Fondu millətimizin genetik yaddaşında ilişib qalan eksklüziv alicənablığı üzə çıxarır və Qızıl Fonda çevirir. Heydər Əliyev Fondu əli açıqlığı təbliğ edir, əl açmağı yox.

Elə bu arada cənnət dilənçiləri Suriyanın uzaq səhralarında əl açırlar. Atəş açırlar. Və elə həmin vaxt da elə həmin müsəlmanların qiblədaşları öz həmdinlərinə Nigeriyada cəhənnəm tikirlər. O dünyanın cənnəti naminə. Ən qəribəsi də budur ki, gözdən qulaqdan uzaq olan və görünür qara olduğundan qaranlıq otaqda hətta olsa, belə gözə dəyməyən Nigeriyada müsəlman imzasına baş verənlərdən o qədər də danışılmır.

Məktəb yaşlı qızları girov götürərək Allah, daha doğrusu Şeytan bilir, hara aparan «Boka-Haram» təşkilatı müsəlmanların xüsusi bir zümrəsinə aiddir. Bu qurumun hədəfinin nə və kim, halal və ya haram olması bu anda bizi o qədər də maraqlandırmadı. Biz uzaq Nigeriyaya ona görə baş çəkirik ki, burada eybəcər və insanlıqdan, bəşərilikdən uzaq bir hadisə baş verib. Sanki venetkaya ironiya kimi çəkdirilmiş bu şəkildəki qızcığazların əzab dolu baxışları bütün dünyanı ittiham edir. Mən bilmirəm, onları girov götürən müsəlmanların da qibləsi bizimlə bir səmtdədirmi? Mən bilmirəm, onları girov götürənlər, doğrudanmı özlərini behiştə qeydiyyatda görürlərmi? Mən bilmirəm bu, «Boka-Haram»dakı müsəlmanlar doğrudan müsəlmandır, yoxsa, onları müsəlmanların içinə dinsizlər desant çıxarıb?! Bil-mi-rəm! Sadəcə onu bilirəm ki, Haram müsəlmanların azyaşlı qızları girov götürməsi islamın imicinə böyük zərbə vurur. Quranı yandıranlardan daha artıq zərbə! Qurani-Kərimi yandıranlar dinsizlər, kafirlərdir, 12-13 yaşlı bu, körpə qızları girov götürənlər, biz müsəlmanları dünyada biabır edənlər isə təəssüf ki, dindaşlarımızdır.

Mən bu qurumun əsl İslama qulluq etməsinə şübhə edirəm. O əməl sahibləri bəlkə də İslamı gözdən salmaq məqsədilə hansısa, xüsusi xidmət orqanlarına işləyirlər. İslam təhsilə zidd deyil, əksinə o elm dalınca getməyi tövsiyə edir, o şəhid qanı ilə alim mürəkkəbini bir tutur. Mirzə Cəlilin bir zamanlar Azərbaycanda qamçıladığı cəhalət uzunqulağı indi Nigeriyada soncuqluyur. Hə, bu gün ortada Nigeriya var və o başqa reallıqlar diqtə edir. Bu ölkədə baş verənlər indi yalnız Nigeriyanın olduqca çətin məsələnin həlli qarşısında aciz qalmış hakimiyyətindən başqa heç kəsi narahat etmir.

Müsəlman dövlətləri Nigeriyanı Şeytanla baş-başa qoyub. Dünyanın müsəlman dövlətlərinin saqqalının tükü belə tərpənmir. Niyə? Axı burada ölən də, öldürülən də müsəlmandır. Məntiqlə bu ölkədə vuruşmalı olanlar elə müsəlmanlar olmalıdır. Onlar silaha sarılmalı və Nigeriyada vəhşiliyin, cəhalətin qurbanı olan həmdinlərini qorumaq üçün vuruşmalıdır! Maraqlı təzadlardan daha biri: niyə öz potensial şəhadətini Suriya cənnətinə “eksport” edən iman və əqidə tacirləri Nigeriyaya yollanmırlar?!. Çox istidir? Cəhənnəmdən də? Nə bilim, vallah! Şəriət qanunlarının çamura batırıldığı, təhrif olunduğu Nigeriyada bəlkə din sülhməramlılarına doğrudun əşəddü-ehtiyac var. Körpə balaları girov götürməyə göz yuman və ya fətva verən şəriətin qaydaları ilə kim yaşamaq istər. Kəfənindən əmmamə tikən üləmalar bəlkə bu bəyaz parçanı açıb başlarını havaya versinlər bəlkə? Dunyanın aparıcı üləmaları haradadır? Və ya dünyanın aparıcı müsəlman dövlətlərini özündə birləşdirən İslam Əməkdaşlıq Təşkilatına üzv olan dövlətlər niyə toplaşmır? Məgər görünmür ki, İslam gözdən salınır?

Bütün Qafqazın Şeyxi Hacı Allahşükür Paşazadəyə görə, «Boka-Haram» təşkilatının İslam adından həyata keçirdiyi əməllərin əslində İslamla heç bir əlaqəsi yoxdur. «Dünya ona görə susur ki, artıq deməyə sözü yoxdr! Burada söz yox iş lazımdır! Körpə qızları girov götürən, dinc adamları qətlə yetirən, insanları xof və təhdid altında saxlayan bu adamların cəzasını Allah özü verəcək. Amma bu dünyada haqq-ədalət mizanına iddia edənlərin də öz imkanları, qanunları və hüquqları var, onlar gərək haqqın sözünü desinlər».

Şeyxdən ötrü məsələnin daha bir maraqlı tərəfi «Boka-Haram»ın «Əl-Qaidə» kimi terror təşkilatı elan edilməməsidir. Amma bundan az maraqlı olmayan bir detalı da bilməyinizi istərdim: Nigeriyanın bir hissəsində müsəlmanlar yaşayır. Şimalda. Belə olan halda niyə balaca bir ərazidə qayda-qanun yaratmaq çətinə düşüb. Mirzə Cəlil Nigeriyalı deyil, burası düzdür, amma ölülərin də milləti olmur, hamısı birdir. Cahil hər yerdə cahildir, istər Azərbaycanda, istərsə də Nigeriyada. Diqqətlə baxaq. Bir halda ki, qaradan artıq rəng yoxdur. Və bir daha düşünək: Bu zənci kim üçün çalınır.