Futbol üzrə Azərbaycan yığmasının və «Qarabağ»ın kapitanı Rəşad Sadıqov karyerasını tezliklə başa vura bilər. Komanda.az saytının əldə etdiyi məlumata görə, 35 yaşlı futbolçunun DÇ-2018-in seçmə mərhələsi çərçivəsində Norveçlə səfər oyununda öz qapımıza vurduğu qoldan sonra üzləşdiyi tənqidlər onun yenidən karyerasını başa vurmaq fikrinə düşməsinə səbəb olub. Bundan başqa, təcrübəli futbolçuya məşqçi kimi bir neçə sərfəli təklif var. Sadıqov hazırda bu təklifləri götür-qoy etməklə məşğuldu.

Əldə etdiyimiz məlumata görə, «Neftçi» rəhbərliyi Sadıqovu baş məşqçi postunda görmək istəyir. Elxan Abdullayevin istefasından sonra Elşad Əhmədova həvalə olunan «ağ-qaralar»ın sükanı məhz sabiq futbolçusuna tapşırıla bilər. Rəşad 2001-2002, 2003-2005 və 2006-2008-ci illər aralığında məhz paytaxt klubunda çıxış edib.

Bundan əlavə, Yaşar Vahabzadənin rəhbərliyi altında o qədər də uğurlu çıxış etməyən, AÇ-2019-un seçmə mərhələsinə uğursuz start verən U-21 yığmamızın da Sadıqova tapşırılacağı barədə məlumat əldə etmişdik. Hazırda Sadıqovla danışıqlar davam etdirilir. Danışıqların necə nəticələnəcəyini bilmirik. Amma bilinən odu ki, həm «Neftçi»nin, həm də U-21 yığmamızın «təzə qan»a ehtiyacı var.

Elə Rəşad özü də futbol karyerasında yeni səhifə açmaq barədə düşünür. Onun elə oyunçu karyerasını davam etdirdiyi bir vaxtda geridə qalan mövsümdə «Qarabağ»ın U-19 komandasını çalışdırması, bu kollektivi Azərbaycan çempionu etməsi Sadıqovun məşqçiliyə olan böyük marağından xəbər verir. «Neftçi» və ya U-21-in «sükan»ı arxasında çalışmaq isə təcrübəli futbolçu üçün UEFA Gənclər Liqasında mübarizə aparacaq «Qarabağ»ın U-19 komandasından da cəlbedici ola bilər.