«Qarabağ» Azərbaycan futbolu tarixində yeni rekordlara imza atıb. Vaxt.az APAsport.az-a istinadən xəbər verir ki, Ağdam təmsilçisi Avropa Liqasının qrup mərhələsində 1-dən çox qələbə qazanan ilk Azərbaycan klubu kimi tarixə düşüb.

Qurban Qurbanovun yetirmələri buna PAOK-la Yunanıstandakı qarşılaşmada əldə olunan 1:0 hesablı qələbə ilə nail olub. Saloniki təmsilçisini Bakıda da 2 qolla yenən əyalət klubu eyni rəqiblə görüşlərdəki qələbələr sayəsində rekordu rəsmiləşdirib.

Bunadək qrupda qələbəsi olan yeganə komandamız kimi də tarixə düşən «Qarabağ» həm 2014/15, həm 2015/16 mövsümünü 1 qələbə ilə tamamlamışdı. Bu dəfə isə rekord 2-yə çatdırıldı.

Təəssüf ki, qrupda çıxış edən digər komandalarımız «Neftçi» və «Qəbələ»nin hesabında hələ ki, qələbə yoxdur. PAOK üzərində qələbələrdən sonra xal hesabını da 7-yə çatdıran «Qarabağ» bu göstəricidə də rekord vurub. Ağdamlılar qrupda ən çox xal qazanan komanda kimi öz nəticəsini yeniləyib.

2014/15 mövsümündə 6 xal toplayan Qurbanovun yetirmələri 2 illik rekordu arxada qoyub. Bakıdakı qarşılaşmada vurulan 2 qolla qrupdakı məhsuldarlıq rekorduna imza atan «Qarabağ» bu göstəricini də yeniləyib. 6-cı qolu səfərdə rəqib qapısından keçirən təmsilçimiz bu mərhələdə ən çox qol vuran Azərbaycan klubudur.

Qeyd edək ki, bu qələbədən sonra «Qarabağ» daha bir nailiyyət - ilk 1/16 finalçımız olmağa daha da yaxınlaşıb.