2017-ci ilin başa çatmasına bir həftədən də az vaxt qalır. Yola saldığımız il bir çox sahələrdə inkişaf tempinin bir qədər güclü yaxud da zəif olması ilə yadda qaldı. Dağlıq Qarabağ münaqişəsinin həlli ətrafında irəliləyişə nail olunmadı. Danışıqlar masasında belə aparılan müzakirələr nəticəsiz qaldı.

Milli Məclisin Müdafiə, təhlükəsizlik və korrupsiya ilə mübarizə komitəsinin üzvü Zahid Oruc açıqlamasında deyib ki, 2017-ci ildə Azərbaycanın ərazi bütövlüyünün real təminatında köklü dəyişikliklər baş verməsə də, siyasi-diplomatik müstəvidə Azərbaycan öz mövqelərini uğurla qoruya bildi.

2017-ci ildə Qarabağ

«Bir sıra məqamlarda Ermənistan cəbhəsinə diplomatik, informativ zərbələri vura bildik. Hər halda, başadüşüləndir ki, bu məsələ yalnız hərbi meydanda orduların toqquşması ilə dəyərləndirilmir. Siyasi döyüşlər də gedir. Burada ölkələrin vətəndaşları iştirak edir. 2017-ci ildə Azərbaycan sürətlə silahlanmanı uğurla davam etdirdi. Nəticə etibarilə Ermənistan öz cəbhəsində zorla bizimlə ayaqlaşmaya səbəb oldu. Nəticədə sosial iqtisadi planlarından, ehtiyaclarından kəsib silah növləri almağa məcbur oldu.

Təbii, bu da əhalinin perspektivinə, sosial durumuna təsir göstərən amildir. Digər tərəfdən birinci Qarabağ müharibəsində hakimiyyəti qazanan və müdafiə sahəsi üzrə vəzifə tutanların bir qismi postlarını itirdilər. Gördüyünüz kimi, 2016-cıə ilin aprelindəki 4 günlük müharibə 2017-ci ildə də Ermənistan hakimiyyətinin bu cür dağınıq olduğunu göstərdi. Bu baxımdan müxtəlif beynəlxalq təşkilatlarda Azərbaycanın Ermənistan əleyhinə qəbul etdirdiyi sənədləri, aktları, bəyanatları siyasi aktivliyimizə yaza bilərik».

Hərbi toqquşmalar qaçılmazdır

Deputat 2018-ci ildə Qarabağ probleminin ədalətli həllindən danışarkən müharibə olacağını istisna etməyib.

«2018-ci il üçün hədəflər ondan ibarətdir ki burada 2 məqam xüsusi önəm daşıyacaq. Birincisi odur ki, Yaxın Şərq məkanında əgər nisbi sabitlik əldə olunduğu təqdirdə, qlobal savaş Qafqaza keçə bilər. Burada Gürcüstan NATO üzvlüyü yönündə addımlar atdıqca bizim də yerləşdiyimiz məkana təsir edəcək. İkincisi, Ermənistanda bildiyiniz kimi prezident üsul-idarəsindən parlamentli modelə keçilib. Bu o deməkdir ki, hakimiyyətin dayanıqlıq mərkəzi dəyişib.

Yəni əvvəlki illərdə bir şəxsin diktəsi altında olan qüvvələr indi bir qədər kollegial orqan olan parlament və hökumət vasitəsilə idarəçilik modelini seçə bilərlər. Bu halda, özünü gələcək baş nazir kimi görən Serj Sərkisyan bütün təsdiqlərə nəzarət imkanlarını itirəcək. Bu zaman Azərbaycan öz gücünü daha yaxşı ifadə edə biləcək.

Azərbaycan 2018-ci ildə 2 amili xüsusi diqqətdə saxlayır. Bunlardan biri müharibədir ki, bu, istisna olunmur. Əksinə, deyərdim ki, hər bir halda hərbi toqquşmalar öz qüvvəsində qalır. Bakının əsas neft hövzələrinin təhlükəsizliyinin təminatına tam nail olduqdan sonra istənilən zaman lokal və ya daha geniş miqyaslı toqquşmalar baş verə bilər. Bu üzdən dövlət rəhbəri prezident seçkilərinə hər zaman uğurlu mövqedən daxil olmağı qərarlaşdırıb. 2018-ci ildə Azərbaycanın uğurlu mövqeyini davam etdirəcəyinə şübhəm yoxdur». (modern.az)