18:45 | 5 iyul 2016 | Çərşənbə axşamı
Məqaləyə 3916 dəfə baxılıb
Şriftin ölçüsü
Ehsan
«A kişi belə zülm, belə dərd olar?»
Azər SARIOĞLU
Məşhur aclıq edənlərdən biri redaksiyada tortla çay içirdi. Uşaqlar soruşanda ki, bu necə aclıqdır? Cavab verirdi ki, çay içirəm də, yemək yemirəm ki. İndi onun sözü olmasın, qonşum deyir ki, orucluq bitsəydi, dincələrdim, əlavə «rosxod»dan canım qurtarardı. Soruşuram nə əlavə xərci? Cavab verir ki, soruşma qardaş, hər ramazan mənə qanı qiymətinə başa gəlir. Qayınanam iftara və imsağa ancaq bozbaş yeyir. Hər sabah qoyun bozbaşı, axşam kənd beçəsinin bozbaşı. Arada bir səbzi plov. Xurma, qoz ləpəsi ən yaxşısından. Meyvə də elə. Zalım qızı bazarlığa mənimlə özü də gedir. Harada bahalı şey var, barmağını ona uzadır. Hələ nəzir etdiyi iftar məclislərini demirəm. İçməyə də «Donat»dı, nədir, o sudan aldırır ki, arıqlasın. Qardaş, deməli deyil.
Əslində qonşumun qayınanası yaxşı arvaddır. Çox ailəcanlı, qonum-qonşunun xeyrinə-şərinə yarayan. Bayaq dedim, ailəsini, uşaqlarını çox sevir. Ancaq ona ilk və hələ ki, yeganə olan oğlan nəvəsi bəxş etmiş ortancıl kürəkənini, yəni mənim qonşumu bir ayrı istəyir. O biri kürəkənlər, yəni bacanaqlar də qonşumu kişi saymasalar da heç vecinə də almır. Hədiyyələr, cürbəcür şirniyyatlarla arvadın qılığına girməyi bacarır. Arvad da «Ərdə olduğum üç kişidən biri mənə oğul vermədi. Ancaq erkək kürəkənim verdi» deyərək qonşumu hər yerdə öyür. Bir əli də onun üstündədir. Altına maşın, cibinə pul qoyub. Qayınananın sayəsində özü demiş, əli çörəyə çatıb, vəzifə sahibi olub. Arvad indi də onu nəzərindən qoymur. Harada güclü molla, baxıcı eşidir, tez özünü yetirir ora. Bir dua oğlan nəvəyə, birini də atasına yazdırıb qayıdır geri. Qonşunun xanımı bizim xanıma deyirmiş ki, oğlu ilə ərinin pencəyinin astarı, yastığının içi dua ilə doludur. Belə qayınanadan kim inciyər? Hələ orucluq ayında oğlan nəvəsi və onun valideynlərinin salamatlığı üçün oruc tutar, ehsan da verir.
Di gəl arvadın bəzi hərəkətləri qonşuma ağlr gəlir.
«Bu orucluqla məhərrəmlik mənim anamı ağladır. A kişi belə zülm, belə dərd olar?» Soruşanda ki, məhərrəmlikdə nə üçün, sözümü ağzımda qoydu. Adamı od götürdü:
- Bu Şümürün, Yezidin lap gorunu... Onlar imamlarımızı qırmasaydı, mən də hər məhərrəmlik 12 imamın adına ehsan verib bu qədər ziyana düşməzdim.- 12 niyə? Axı imamların hamısı Kərbəlada şəhid olmayıb.
- Yəni demək istəyirsən hamısı Məhərrəmlikdə ölməyiblər. Bəs neçəsi ölüb?- Haradasa ikisi, ya üçü.
Başımı əyərək bir-iki kəlmə də dini-maarifləndirici söhbət etmək istəyirdim ki, qonşumun «Ayə, Allah köməyin olsun» deyərək evə tərəf qaçaraq getdiyini gördüm.
