Dünən prezident İlham Əliyevin sərəncamı ilə adı nurçuluqda çəkilən Prezident Administrasiyasının Siyasi təhlil və informasiya təminatı şöbəsinin müdiri Elnur Aslanov vəzifəsindən azad edildi. Yayılan məlumatlarda onun ölkədəki nurçuların əsas rəhbərlərindən biri olduğu iddia olunur. Aslanovun «Gülənçi»lərlə sıx əlaqələrinə dair məxfi sənədlər hələ 2011-ci ildə məşhur WikiLeaks qalmaqalında yayılıb.

Gündəmi dəyişən bu sərəncamdan sonra Azərbaycandakı «Gülən təhsili»nə son qoyulacağı daha da real görünür.

Türkiyə mətbuatı baş nazir Rəcəb Tayyib Ərdoğanın bu barədə yaxın münasibətdə olduğu dairələrə, həmçinin dövlət başçılarına xüsusi müraciət göndərildiyini də yazır. Nazir rəsmi Bakıdan Gülənlə mübarizədə ona yardımçı olmağı xahiş edib.

Məsələ ilə bağlı təhsil eksperti Etibar Əliyevin fikrini öyrəndik. XXI əsr Təhsil Mərkəzinin rəhbəri adları nurçuluqda çəkilən həmin təhsil mərkəzlərinin bağlanacağına inanmadığını deyir:

«Orta məktəblərdə və ya Qafqaz Universitetində demək olar ki, heç bir ideoloji və siyasi cərəyan təbliğ olunmur. Müxtəlif söhbətlər gəzir ki, onlar nurçularla bağlıdır və sairə. Ancaq mən həmin məktəblərə yaxşı bələdəm və tam əminliklə deyə bilərəm ki, konkret olaraq orta məktəbdə uşaqların beynini hər hansı bir ideologiyayla doldurmaq planı görsənmir. Məqsəd sırf yaxşı və fərqli təhsil verməkdir. Və bu gün şübhəsiz ki, TQDK-nın keçdiyi imtahanlarda bu, öz əksini tapır. Həmin abituriyentlər yüksək bal toplayırlar və ali məktəbə daxil olurlar. Bundan başqa, ailə məktəbə daxil olanlar və orta məktəbə bitirən şagirdlərin əksər hissəsi Türkiyədə təhsil almağa meyllidirlər».

Ekspert nurçuluq hərəkatının inkişafını inkar etmir: «Şəbəkə kifayət qədər genişlənib. Bunun əsas səbəbini də artıq hamı bilir. Həm gəlir gətirir, həm də vətəndaşları özünə cəlb edir. Amma əgər konkret məktəblərdə hər hansı dini yönüm olsaydı Azərbaycan vətəndaşları öz övladlarını həmin orta məktəblərə və Qafqaz Universitetinə etibar etməzdilər».

«Bəs ölkə üçün hansı məktəblər daha təhlükəlidir» - sualına isə Etibar Əliyev belə cavab verdi:

«Azərbaycanda 3 məktəb tipi var. Bunlar tədrisi ingilis dilində olan ingilis məktəbləri, Türkiyə məktəbləri və yerli məktəblərdir. Məktəbdə nəzarət yoxdursa, tədrisin keyfiyyətinə diqqət yetirilmirsə, uşaqlar bütün günü küçələrdədir və siqaret çəkirlərsə, dini məkanlara üz tuturlarsa bu, təhlükəlidir. Təhlükənin belə yerlərdən gözləmək olar».

Fətullah Gülənə aid dərsanələrin 2015-ci il sentyabrın 1-dən bağlanacağını nəzərdə tutan qanun layihəsi Türkiyə parlamentində təsdiqdən keçib.

Bu tipli məktəblərin bağlanacağı barədə rəsmi məlumat yoxdur. Hakim Yeni Azərbaycan Partiyasının (YAP) icra katibinin müavini, Milli Məclisin deputatı Mübariz Qurbanlı mətbuata açıqlamasında ümumiyyətlə, belə bir təriqət tanımadığını vurğulayıb:

«Kimsə gəlib maarifçiliklə məşğul olursa, ona nurçu deyirlər. Məgər məktəb açmaq qəbahətdir? Məktəb açan adam məktəb açdığı ölkənin qanunlarına uyğun tədrisi həyata keçirməlidir. Bu edilməyəndə, istənilən ölkədə həmin məktəbin qarşısı alınır. Ümumiyyətlə, İslamda da nurçu təriqəti yoxdur». (Hafta.az)