«Daşınmaz əmlak bazarında hələ belə durğunluq olmamışdı. Mənzillərin qiyməti hər gün bir az da aşağı düşür. Məsələn, Nərimanov rayonunda 90-95 min manata satılan 1 və ya 2 otaqlı mənzillər indi 60-65 minə təklif edilir. Kifayət qədər ucuzlaşma olsa da, bir dənə də olsun alıcı yoxdur. Demək olar ki alqı-satqı dayanıb».

Bunu Anspress-ə Nərimanov rayon məhkəməsi yaxınlığında mənzil alqı-satqısı ilə  məşğul olan İlqar Mustafayev deyib. Onun sözlərinə görə, manatın «üzən məzənnəyə» keçidindən sonra evlərin qiyməti də 20-25 faiz düşüb.

Mənzillərin qiymətinin ucuzlaşdığını paytaxtın digər ərazilərində fəaliyyət göstərən «makler»lər də etiraf ediblər.

Bu sahədə çalışan Mirzə Əliyev deyir ki, qiymətlərdə 10-20 min arası ucuzlaşma var. Bu prosesin hələ davam edəcəyi də istisna edilmir: «Tək alqı-satqı da yox ,elə kirayə bazarında da müştəri qıtlığı yaşanır. Ötən il 250-300 manatlıq evlər 100-50 manat aşağı təklif edilsə də, kirayə ev axtaran insanlar üçün bu qiymətlər də hazırda münasib deyil. Bir sözlə qiymətlər aşağı düşsə də təlabat sıfır səviyyəsindədir».

«MBA Group» konsaltinq şirkətinin baş direktoru Nüsrət İbrahimovun da fikrincə, qiymətlərdə eniş hələ bir müddət davam edəcək. Onun hesablamalarına görə, hazırda əmlak bazarında qiymətlər 22 faiz, konkret mənzil bazarındasa bundan bir qədər çox 26 faiz azalma var.Bu azalmaya baxmayaraq qiymətlər hələ də yüksəkdir. Bu fikirlə ekspertdə razılaşır. O deyir ki, qiymətlər reallıqla uzlaşmır.

«Əmlak bazarındakı durum həm xarici, həm də daxili amillərlə bağlıdır. Xarici amil kimi buna neftin qiymətinin düşməsi, eləcə də Rusiyadan gələn pul kütləsinin azalması təsir edir. Daxili amillərə gəlincə, insanların psixoloji baxımdan neqativ gözləntiləri var. Ona görə də əllərindəki vəsaiti xərcləməyə qorxurlar, qara günlər üçün, ehtiyat saxlayırlar.

Mənzil bazarında canlanma yaratmaq üçün xaricdən maliyyə axını olmalıdır. Bundan başqa ölkəmizdə ev almaq istəyən əcnəbilərə müxtəlif güzəştlərin tətbiqi zəruridir. Xaricilərin daşınmaz əmlak bazarına axınını sürətləndirmək üçün əcnəbilərin, elə qardaş Türkiyənin təcrübəsindən istifadə oluna bilər. Məsələn, 2013-cü ilin fevralına qədər Türkiyədə ev almaq bir az çətin idi. Amma yeni qanuna görə, indi Türkiyədə ev almaq asanlaşıb.

Qardaş ölkə, Azərbaycanda daxil olmaqla 180-ə qədər xarici ölkə vətəndaşına cüzi məhdudiyyətlərlə hər cür daşınmaz əmlak əldə etməyə imkan verir. Bu isə Türkiyə qanunvericiliyində öz həllini tapıb.

Oxşar təcrübədən ölkəmizdə də istifadə olunarsa həm mənzil almaq üçün üz tutan xaricilərin sayı da artar, həm də bu bazarda canlanma yaranar».

Hər halda yaranmış vəziyyətdən çıxış üçün təklifləri sınaqdan keçirmək lazımdır. Çünki daşınmaz əmlak bazarındakı mövcud vəziyyətin hələ nə qədər davam edəcəyi sual altındadır. Ev almaq istəyən vətəndaşlarsa hazırki vəziyyətdən səmərəli istifadə edərək illərlə mövcud olan mənzil problemlərinə son qoya bilərlər. Təbii ki, pul olan yerdə.