Nyu-York birjası ABŞ Federal Ehtiyat Sisteminin (FED) bu gün açıqlayacağı pul siyasəti qərarları öncəsi günə üfüqi tendensiya ilə başlayıb.

Açılışda “Dow Jones” indeksi 0,05 faiz artaraq 41 628,91 bənd olub.

“S&P 500” indeksi 0,13 faiz artaraq 5 641,68 bənd, “Nasdaq” indeksi isə 0,20 faiz artaraq 17 663,38 bənd olub.

FED-in bu gün 4 ildən sonra ilk faiz endirimini edəcəyi gözlənilsə də, birjalarda üfüqi kurs müşahidə edilir.

Bankın atacağı addımın ölçüsü ilə bağlı qeyri-müəyyənlik davam etsə də, birjalardakı qiymətləndirmələrdə FED-in 50 bəndlik addımla faiz endiriminə başlaması ehtimalı 61 faiz, faiz dərəcəsinin 25 bəndlik azaldılması ehtimalı isə 39 faidir.

FED-in qərarı ilə bağlı bu qədər qeyri-müəyyənliyin olmasının qeyri-adi olduğunu bildirən analitiklər, son vaxtlar FED-dən 25 baz bəndlik azalma gözlənildiyini, lakin 50 baz bəndlik azalma gözləntilərinin keçən həftə sürətlənməyə başladığını ifadə etdilər.

Bu qeyri-müəyyənliklər səbəbiylə pul siyasəti qərar mətnindən və FED sədri Cerome Pauellin açıqlamalarından alınacaq siqnalların aktiv qiymətlərinə təsir edəcəyinə diqqət çəkən analitiklər, açıqlamalardan sonra bazarlarda volatilliyin artacağının gözləndiyini bildiriblər.

Makroiqtisadi məlumatlarda ABŞ-da tikilən yeni evlərin sayı avqust ayında 9,6 faiz artaraq gözləntiləri üstələyib. Ölkədə verilən tikinti icazələrinin sayı da avqust ayında aylıq 4,9 faiz artaraq gözləntiləri üstələyib.

ABŞ-da 30 illik ipoteka üçün orta faiz dərəcəsi, FED-in faiz dərəcəsinin endirilməsi gözləntiləri ilə keçən həftə 6,15 faizlə 2022-ci ilin sentyabrından bəri ən aşağı səviyyəsini qeyd etdi.